LUNGSOD NG SAN FERNANDO — Binigyang-pugay ng Pamahalaang Panlalawigan ng Pampanga ang mga nakatatanda sa isang pagpupulong na layuning palakasin ang kanilang kaalaman sa mga karapatan at benepisyong nakalaan para sa kanila.
Pinangunahan ni Gov. Lilia “Nanay” Pineda sa pagtitipon ng mga 2,096 senior citizen mula sa Una, Ikatlo, at Ika-apat na Distrito, kung saan binigyang-diin niya ang mahalagang papel ng mga kabalen na patuloy na nagsisilbing inspirasyon at haligi ng bawat pamilya.
Kasama ni Gov Nanay sina board member Christian Halili at Cherry Manalo ng 1st District at Dr. Kaye Naguit ng 4th District, provincial social welfare and development officer Fe Manarang na nagbahagi ng mga programa at insentibong handog ng Kapitolyo para sa kapakanan ng mga nakatatanda.
Tinalakay ni National Commission of Senior Citizens (NCSC) regional director Emmanuel Daez ang overview ng ahensya at ang RA 11982 (Expanded Centenarian Act of 2024) na nagbibigay-pagkilala sa mga Pilipinong umaabot sa ganap na 100 taong gulang pataas.
Nagbahagi rin si Liezel Llarves mula sa DSWD Region 3 tungkol sa Social Pension for Indigent Senior Citizens Program, na nagbibigay tulong-pinansyal sa mga matatandang walang sapat na kita.
Samantala, ipinaliwanag nina Mylene Lumber at Dr. Jocelyn Pangan ng PhilHealth Region 3 ang mga benepisyo ng Yaman ng Kalusugan Program (YAKAP), habang tinalakay ni Mark Apaya ng LandBank ang mga serbisyo ng bangko na maaaring magamit ng mga senior citizen.
Nakatanggap rin ang mga kabalen ng tig-₱1,000 cash food assistance at libreng gamot.
Sa pamamagitan ng programang ito, muling pinatunayan ng Pampanga na tunay na may puso para sa mga nakatatanda—isang lalawigang kumikilala, gumagalang, at nagmamalasakit sa mga haligi ng lipunan. Pampanga PIO
