Metung ne namang SM ing bayung buklat
King kabalenan ning maunlad a siyudad
Na ning San Fernando a meging bulalag
Nu’man karing parti niting Pilipinas.
At mangga na karing mialiwa pang bansa
Ing mesabing lugal bulalag yang bina
Pasari ding keyang anak a makudta
King arte’t kulturang e ra imbut matda
(At e mu uli ding higanti nang parul
Ampon karing mangatikas a burarul,
Nune pati na king sukat pagmaragul
A ngeni ‘last term’ nang ‘world class city mayor).
Atyu king bantug a siyudad a mesabi
Ing ngara pin ‘country’s biggest SM City’
Bukud king bayu pang biklat dang abeinti
Ning Julyo a me-‘bless’ niang adisinuebi.
At nu’ ining maluka yung talasulat
Akabilang de king ‘blessing’ a merapat
Ding e mabilang a bisitang dinalpak
Karing escalator pababa, paukyat.
Mika-misa bilang dake ning okasyun
King mesabing banal a panga-bendisyun
Niting mesambitlang kabubuklat pang ‘mall’
Ning SM keti king kalibutnan Luzon.
Ating memagkanta a pangangawilian
Ing timbre da bosis king kantang kundiman
A maluat-aluat nang e ta’ daramdaman
Karing mamagkanta ngening salukuyan.
Inya naman kabang itang pamisulu
Arapan ning apag a sidya rang tahu,
A nu’ libri’ing sabla karing anggang tau
Asna king kasaya ampon kakusuelu.
Pablasang ing sunis ding mesabing kanta
Kanita pa yatang dekada singkwenta
Darandaman tano’ karing mangatua na
A kekatang sadiang mangayap magkanta.
Kalupa nang Ruben Tagalog at Sylvia,
Nang Armando Ramos at Larry Miranda;
Di Carmen Rosales, Rogelio at saka
Ding Mabuhay Singers ketang panaun da.
Ampon aliwa pa a e ku na balu
O atatandanan ing tune rang lagyu,
At malyari ta’ la sigurung abalu
Karing kasing idad ding kekatang apu.
(Karing kumbiradung bisitang dinatang,
A kabilang karing kekatang opisyal,
Kayabe ya’y Oca at ing ‘famous Nanay’
Ampon aliwa pang e ku na sambitlan)
Penandit mu mipanagkat na keng tipa
Di Rolan Quiambao at ding kasulu mi pang
Mengan a karap mi king meto’ lamesa;
Y Ben Escasa at ing keyang asawa.
King pangakabilugan asabi kung ganap
Itang bage-bage a karelang tatag;
Masaya, mabsi at masayang pamiarap
Ding mikalu-kalu ing karin merapat.
At mangaintulid mu ing katutula ra
Ding memalen keti king mal tang’ probinsya
Ing pangatalakad na ken ning metung pa
A modernung SM Mall keti Pampanga
At sana, bistaman dakal lang tututul
Karing mangatua na at malating ‘stall’
Kilub ning palengke laban king mesabing Mall,
Suportan ta’la ban e lubus masaul.
E ta’na alisian, king balang panyulung
Ating madadalpak a e mu pin metung,
Inyasa’t e tana sukat ipagmalaun
Pablasang itinan sangkap ning panaun!
