DAKAL a Salamat ing kanakung babie
Kang Poeta Gozum king binye ng puge;
Ing aldo kung beitan dinina’neng kule
At king dalangin nang kumaba ining bie,
Lakaran king Sabi ban panimunan ke
Kanita’yng panlakad lalu pang tumibe.
Dakal A Salamat king kapanwala’na,
Dapot ing kanaku, sukat no ring matwa
Uling malwalas na itang delanan da
Inya king sibukan deti tanak nala,
Lakaran king Sabi inya sumulung ya
Nung balang kikimut tapat ing nasa ra.
Ninu mang kayanib karing balang lakad
E ya tatabiling mamabit king kawad
Agyang mangaplas la detang kayang palad
King pamangulyut na matulang tutupad,
Mabayat mang obra e manayang bayad
Ing mal nang amanu pilit neng isadsad.
Ing kayang sarili e na tataluktuk
Ban palakpakan deng king katasan ipuk;
Kaya makagyu nang yang bukud mitampuk
Ing kayang amanung pagsilbya’nang lusuk
E na bala kaya’yng bili re king suluk
Ing AMANUNG SISUAN, king matas ya mipuk.
King pamanuli ku kakung atangalan
AGTACA at BUKLUD karelang ugnayan
Ampon SSNK grupung kayanakan
Ing nanu mang galal ere panenayan,
Amanu’t Kultura matulang gimbulan
Arap ding memalen king Baryu Mancatian.
Muna keng sambitlan Tatang Felix Garcia
Kadwa’y Pol Batac ning balen Sta Rita,
Y Ma’m Kate Lapuz, Ka Ogie dela Peña
PL Rodel Gozum, Freddie (Tobias) king sipag da;
Totoy Balas – matula yang memulosa,
SSNK at ding sablang kayabe ra.
Totoy Bato yang karelang perangalan
Arap ding memaryu Barangay Mancatian,
King ba rang imulat den karing kerakalan
Ing mayap nang gewa king Kulturang menan
Ampon pamisulung king Amanung Sisuan,
Inya saganan lang matning palakpakan!
Dolly Poylorenzo Gigante,
a.k.a. Dalagang Baryu
Brgy. Anunas, Siyudad ning Angeles
