MIBAIT NE ketang metung a Sabado,
Niting Oktubre keng RW Radio,
95.1 king Siyudad San Fernando,
Ing bayung programa ding poeta tamu
Ampon taladalit king Amanung Sisuan
A mikalu-kalu ban magambul miuman
Ing kultura’t sabing e sukat masintang
King kelan lingap ding atyu keng tungkulan
At kabalen tamung lubus migpabusta
King katutubu at menan tang Salita,
A nu’ bistaman ing Tata at ing Inda
Den Kapampangan la – pero ing menasa
E ro pakisabian ding karelang anak
King salitang nu’la reti sukat miyanad,
Inia nanu’t e ing kang Sam at Balagtas
Ing mitanam lubus king karelang utak?
Alang matsura keng mabiasa lang Inglis
Tagalug, Espanyol, Niponggo at Franses;
Pero karapat-dapat mu at matulid,
Ing sariling sabi ing dapat masagip!
Uli niti, banting kalupa ning sadia
Apalabung ne ping migit king minuna
Ning Parnasong Kapampangan ing kultura
At menan tang sabi, oyan mibait ya
Kapamilatan ding bibilug kaniting
Kalipunan da ring pawang mangatikding
Poeta at Poetisang manga-galing
Mamikudtang kawatasan a masanting.
Kambe antimurin dening taladalit
Kantang Kapampangan a malagu sunis
A keta busal na ning benging tahimik,
Mararamdam karing aklis nang Adonis
Neng haranan ne ing keyang mutyang hirang
Tulid nang awang neng benging kapitangan
At nu’ ing aslag na ning aranyang bulan
Yang saksi king ain niting kapalsintan
Makanian neng buring biayan pasibayu
Ning kimutan a’yting biklat da king radyu
Ding manimuna at pekatimun mismu,
A’yantimo ken ing Ari ning Parnaso,
Renato Alzadon… kambe nang Santiago
O Kuya Boy anting peka-‘host’ king radyu,
Ning programang yan a ibat nyang Sabado
A kalabing-siyam ya ing Oktubre mismu
Mibait ne pin ing mesabing programa,
Nung nu’ ding bibilug pawa lang poeta,
Taladalit, pulosador, poetisa
Ning Amanung Sisuan at kulturang mana.
A kabibilangan nang Dalagang Baryu
A peka-prinsesa at pamuntuk mismu
Ning Liga ding pawang poeta laureadu
Ampon aliwa pang talagambul tamu.
Iting “Kapampangan: Lahing Penibatan”
A peka-tema ning programang itinan,
Malyari yu ne pung apakirandaman
Karing kekong radyu ngening salukuyan
Umpisang alas 2:00 neng aldo Sabado
Anggang alas 3:00 keng istasyun ning Radio
RW 95.1 a nomiro
Karing durutan da ren nung atin kayu!
Pasibayu, miuman da ko’ pung agkatan
Keng programang yan a purung Kapampangan
Ing dandaman tamung poesia at kantang
Igale, idalit ding tumagun, dating!
