1.
Karing nanu mang disisyun nung atin tamung ayalak
a kamalian, dapat la mung mitulid ampon masamas
iti e ya makasira king awsan dang integridad
nun e ya ing mangitulid karing bukut a pamalak
2.
Lakuas nung ing pisasabian dikil king ratipikasyun
ding nanu mang ordinansa batas ampon resolusyun
karing maselan a bage at maragulang transaksyun
kelangan ing kaingatan bayu ta la ibalayun
3.
Dapat balu ra ngan detang kayabe king pisasabian
ing kumpletung impurmasyun king karelang disisyunan
aminan tamu o ali malilyari ustung misan
ating bage mararapat uli ning kapanekasan
4.
Nanung atin? oba’t misan atin pang susukal a lub
karing bage pikayarian nung sakali e malaus?
e wari ing dapat gawan king ban mayan lang dumagus
ding kekata’ng kapagnasan ulipan la ring kapeltus
5.
Ating batas, awa tutu a sandigan ding menasâ
a kekata’ng dalerayan king ban e tamu milisyâ
dapot ating panaun a deti e la makayakmâ
king prusesu a daralan king paralang malalaguâ
6.
Karing disisyun neng misan lohika ing magagamit
pablasang king batas ating madadalpak a matulid
nung inia sa’t e la ditak a tau retang manangis
magdusa king kasalanang e ra naman rugu malit
7.
Nung ing pamalak ning metung, a nasa nang idagisut
king nanu mang kapulungan linawan no pa sa’ng lubus
karing sablang kayabe na ring egana-ganang datus
bayu na la amuyutan karing pigampa na’t buyut
8.
Uling ustung ing disisyun king balen e makakayap
ding memalen ding mumunang diling manamdaman kaplas
agiang mangapayus la pa karing karelang gulisak
ban sagkan ing malilyari ala na lang akarapat
9.
E ta la sa bubulagan ding kekatang panimanman
karing kislap da ring gintu ampon perlas a kikinang
uling migit yang maula ing dangalan ning ninu man
kumpara king nanu pa mang klasi da ring kayamanan
10.
Karing kekatang pamalak samasan ta’ng magdisisyun
king ban e tamu sumisi king daratang a panaun
ing sariling kaimbutan king e masampat a layun
karas na ning takdang oras lalaklakan na nitang gabun…
