Napun a singku ya bulan ning Nobyembre
Dos mil beinte trese (2023) ya, bulan a mesabi,
Aku pu antimong peka-presidente
Ning AGTACA, mika-kapulungan kami;
At king kayaldawan a’yti mepisabi
Ing aku pu bisa na kung payalili.
A merapat keni king barangay Camias,
San Simon keni king Resort ning kapatad
CRIS “Apu” GONZALES, a tune malingap
At makimasabal king Sabing e dapat
Malumpawi ampon mate ken at sukat
Pasari ning kelan malasakit ganap.
At antining aku king ngeni idad ku
A migit na rugu king otsenta’y singku,
Burian ku man ing e pa kuldas, balu yu
Ing magkang atin nang masusora kaku;
At ken kabilang ne ing manakitan ku
Nung inya anti kung kampante siguru.
At metung pang e ku katutula misan
Ya’ytang e ra na ku pasintabian mu man
Bilang Pamuntuk ning kekatang Aguman
Ding Talasulat a tune Capampangan,
Buri re pang keti makipag-layunan
Mamutung Laurel ing e tamu kakintal.
A ngaku pin iti e ya keti labuad
Na ning Capampangan bait o misapuak,
Waman nung maniabi ya’yti at sumulat
Capampangan ya king aske na’t talakad;
Pero para kaku e pa murin dapat
Kilalanan keti antimong kapatad.
Mengari ya mu namang pulitiku,
A keti king labuad seli na la botu
Ring keya minalal waman yan e ustu;
A ing kalakaran pin mistulang duelu.
Kasulatan, singka-santing, pati tonu
Na ning pamigale matatakal pihu.
Kasi ing sukad a dapat mipamintuan
Keng pamisulat ding silaba, kailangan
Ing ustu la reti – e migit-kumulang,
Nu’ne reti pawa lang ustu keng bilang;
Ken ya mayayakit ing tune gelingan
Ning keng ninu pa mang makipagligligan.
Inyasa’t nung iting poetang anti pin
Ning anti kaniting milalu kayangin,
Iti e metakal king tagle nang galing
King e ustung dalan, nung wari keng saging
Kasebian kulang ya kanu king kapiling?
Yan e king anti keng insultuan pa murin!
At ining dikil keng panga-putungan na
Antimong Ari na Parnaso (ngara)
Na ning Capampangan, metung ku kareta
A e ra atanggap ing mitutulu ya
King taung ya ing sukat mike keya,
Uling e memalen keti king Pampanga.
Iti yang malino kakung pasiwala,
E king ating kule ning nanu mang Dirya
A ibasibas da kaku ring aliwa;
Ike king ustu ing pamamie upaya,
Basi antimurin king dapat magawa,
E king uling Capampangan ya Salita;
Kalawigan ya – uli ning e wari
Biasa kang mag-English, ing tangu nang Eri
Ing mangibabo at ika kararagli
Mipabilang karing Kanu at kauri
Da na ka reti at king State mag-Ari?
Iti ing kutang kung alang pasubali !
