KUNG BASE dito sa isa pang listahan
ng ‘PDAF releases’ bago ang halalan
‘Year 2013’ – ay hindi kabilang
si Ramon Revilla, Jr. sa tinuran
Na nangumisyon o mga nakatanggap
ng ‘share’ nila mula sa nasabing PDAF,
Kung saan sa DBM galing ang ulat;
at di kay Napoles, Luy, Lacson nagbuhat
O ng sino pa mang may listahang tangan,
kundi ang ‘Department of Budget’ ang siyang
may ulat na itong PDAF na naturan
ay gawa na bago ang ‘Highest Tribunal’
Ay nagpasiya na ang bagay na nasabi
ay ‘unconstitutional’ sa tuwirang sabi,
At karamihan n’yan ay na-‘release’ pati
bago mag-eleksyon (kung kaya posible?)
Ang isang bagay na nakapagtataka
ay itong kung bakit ang hindi kasama
sa listahan nitong DBM ay siya pa
ang sa Camp Crame ay pinakulong nila.
Gayong hindi pa man siya nalilitis
sa alin manding ating ‘bar of justice?’
At ni pag-‘post’ ng ‘bail’ lubos pinagkait
kung kaya maaring yan ay panggigipit?
O sadyang ang batas na pina-iiral
laban sa kaaway na pampulitikal
ng nangakaupo riyan sa Malakanyang
ay ang tinatawag na ‘weather-weather’ lang?
(Na kagaya nitong dinaranas ngayon
ng ating butihin at dating Pangulong
Gloria Macapagal na ipinakulong
ng mga kakampi ng administrayon
Na ayaw din nilang makasilip man lang
sa mahal na bayan niyang sinilangan,
gayong ni hindi pa man napatunayan
na nagkasala ng pandarambong si Mam!)
Ang usapin hinggil sa isyu ng PDAF
ay di basta na lang yan kaagad-agad
posibleng mabigyan ng dagliang lunas
sa pamamagitan ng ika nga’y dahas
At paghuli basta sa itinuturong
anila’y sangkot sa grabeng pandarambong,
Kundi sa maingat na imbestigasyon
at prosesong legal marapat ituon.
Masakit para sa ninumang nilalang,
lalo na sa mga nasa katungkulan
ang ibilad agad yan sa kahihiyan
ng dahil lamang sa paninira minsan.
Katulad na lamang nitong kung alin pa
itong sa ‘DBM list’ ay di kasama
– na dili’t iba nga ay si Bong Revilla –
ang siyang kumbaga ay sinampolan nila.
Di ko sinasabing walang kasalanan
si Mr. Revilla o ang sino pa man,
Pero ano’t hindi natin sila bigyan
ng ‘day-in-court’ bago dalhin sa kulungan?
At pansamantala payagang magpyansa
dahil sila’y di pa ‘convicted’ kumbaga;
At hayaan munang ipagtanggol nila
ang sarili sa’ting korte ng hustisya.
Papano kung sila ay biktima lamang
ng ‘demolition drive’ o ng ano pa man?
At pagkaraan ay saka matuklasan
ng Korte na sila’y walang kasalanan?
Maibabalik pa bang dangal na nasira
ng taong dumanas ng pagkapahiya,
matapos ang lahat, at siya’y mapalaya
ng Korte sapagkat ya’y inosente nga?
