king labul ning angin, terak ka’t kekera,
pilit kang lalaban, ban e ‘gad mapatda,
uling nung masambut, milako ka sala,
nung mapalyari ini, akwa mung kakapa.
e agad mapupud, mitsa mung misindi,
kabang makakaul, mapali mung api,
tutulung likidu, sumyas mu nung langi,
mitipun king lalam, ali mikawani.
king mabilug a keyk, keni ka telakad,
pilan pang minutu, ‘tin kanta’t mimindak,
ing mika-kebaitan, t’yupan na kang agad,
sabe sabeng tula, pane sasagakgak.
libutad deng Santo, mitulus king altar,
mikabanding bale, rosariong tatalnan,
mangading taimtim, at pasalamatan,
king grasyang pigkalub, kaya ning Miglalang.
balamu bante ka, king mipante bitis,
akit mu ing lumbe, marakal tatangis,
mitipun a tau, makirameng labis,
papatak yang lalu, matang luang akakit.
puntud a melagad, ini nung pasyalan,
mag-aleng pangadi, meulilang lekwan,
imbut ing kaladua, t’yu ‘santing kabilyan,
kandila kang saksi, king lugud ‘lang anggan.
orasyung sinitsit, ining albularyo,
deng patak bat keka, king danum pepalto,
sakit ning pelawe, keni apagsino,
nokarin menibat, malagwang aulo.
malukang balayan, sane king kabengian,
kandilang milele, saguling gamitan,
de gaserang gaas, yang meging katuwang,
aduang babie sala, misalit salitan.
nung magisan mitsa, e maliaring sindyan,
ala nang magsilbi, miras king angganan,
titipun-tipunan, patak mung melakwan,
buung pasibayu, ‘tin pang pakinabang.
nung magsilbi sana, wangis tang kandila, pangisnawa tamu, e agad mapatda,
datang man ing lungkut, o maging ning tula,
lalaban king angin, ban e mate ing sala.
