ITONG kahilingan ni Janet Napoles
na payagan siyang maging ‘state witness’
laban sa kung sinong mga Senadores,
Congressmen at iba pang posibleng suspek
Sa ‘PDAF scam’ na halos ‘one third’ yata
ng nasa Senate at Batasang Pambansa
ay nanganganib na ibulgar ika nga
ni Ginang Napoles para makalaya
At malasap muli ang sarap ng buhay
sa labas, katulad ng nakasanayan,
ya’y marapat lang na suriing mataman
ni De Lima bago tuluyang aksyonan
O nitong alin mang ating ‘bar of justice’
upang ang anumang posibleng ‘malpractice’
ay maiwasan at di maging panganib
sa seguridad ng bansa si Napoles.
Pagkat di malayong pati si Magellan
ang isabit nito sa isyu ng ‘scam’
para lamang nito lubos matakasan
itong naging mitsa ng pagkakulong n’yan.
Mabuti-buti kung totoo talaga
at hindi ‘concocted’ lang ang ikakanta;
Walang inosente riyan na magdurusa
habang ang tunay na ‘culprit’ ay masaya.
Eh kung liban kina Enrile, Revilla
Jinggoy Estrada at iba pang kasama
ay mayrun ding taga Malakanyang pala,
at nagkataon pang ito’y kapamilya
Ni PNoy o kaya may utang na loob
ang mga Aquino sa posibleng sangkot,
di kaya direktang kumorba ng lubos
ang tuwid na daan niyang bumaluktot?
Malay natin baka may mga tao rin
si Sir sa ilang posibeng dawit din,
tulad halimbawa kung ito’y kalihim
na di niya magawang direktang ipitin;
At maliban dito may maituro pa
si Ginang Napoles sa gabinete niya,
sanhi na rin nitong baka mas higit pa
ang bilang ng nasa kampo niya talaga?
Hahayaan kaya ng ating Pangulo
na masampahan ng mabigat na kaso
ang isang tunay na kanyang kaalyado,
sakali’t humantong sa ganitong punto?
O hangga’t maari niyang maitago
sa mata ng bayan, ikukubling lalo?
Bunsod ng matinding mga pagkabigo
nitong sa bayan ay kanyang pinangako
Na walang natupad at di niya nabago
ang kasalukuyang takbo ng gobyerno
gayong halos ‘two years’ na lang sa Palasyo
ang natitira sa ‘six years’ niyang termino.
“Tuwid na Daan” ang pangako sa atin,
pero ano itong nakikita natin,
kundi pandarambong at nakawan pa rin,
na mas masahol pa sa dati marahil?
Na inaakusa laban kay Ate Glo
ng administrasyon ni Nonoy Aquino;
At kung saan pati pagdalaw lang mismo
sa sariling bayan ng dating Pangulo
Ay ayaw pagbigyan nitong Malakanyang
gayong si GMA ay suspek pa lamang
at di pa ‘convicted’ sa ibinibintang,
na pandarambong sa salapi ng bayan
Sabagay, ganun din itong kay Napoles,
akusado pa lang o ika nga’y supek,
kaya itong Motion niyang mag- ‘state witness’
ay posibleng i-grant ng Justice Department?!
