PALAUIG, Zambales – Himalang nakaligtas sa kamatayan ang isang provincial jail guard ng Zambales matapos tambangan ito ng tatlong di pa kilalang suspek sakay ng motorsiklo sa National Highway Barangay Liozon sa bayang ito.
Kinilala ng pulisya ang biktimang si Prima Dona Santos, 42, at residente ng Brangay Salaza ng nasabing bayan.
Sa imbestigasyon ng pulisya, papauwi na si Santos sakay ng kanyang motorsiklo na may plakang 9901-CE nang mapansin nito na may nakaparadang motorsiklo sa kanyang daraanan na tila may hinihintay at pagkalampas nito ay napansin ng biktima na siya ang sinusundan kung kaya nagging alerto ito.
Pagsapit sa nasabing lugar binaril si Santos at tinamaan sa kaliwang balikat ngunit nagawa nitong takasan ang mga suspek sa pamamagitan ng pagtakbo sa palayan para iligtas ang sarili sa kamatayan.
Patuloy ang ginagawang imbestigasyon ng Zambales PNP sa motibo ng pananambang at ang pagkakakilanlan sa mga suspek.
