Milyaring sakuna nyang datang ya’y Sendong
Uling pemutut do ding dakal a dutung,
Darala nang danum ala nang magkanlung
Inagus nong’ trosu king baba dinulung,
Balang delanan da anting mepagulung
Dakal la ring mete, tinangis daralung.
Detang mengamate libu kabilangan
Antimurin detang karelang payntunan,
Maka-ale-ale kekang atangalan
Balita keng T.V. at dyaryung pamasan,
Dapot king milyari ninung dapat sisyan,
Ding memalen kaya o ring manungkulan?
E wari ‘ting batas deti sasabyan da
Iting kalikasan dapat protektan ya;
Bakit karing bunduk ‘logging’, pamagmina
Alang maka’bawal agyang lantaran na,
King libutad dalan dakal magprotesta,
Pamagmina’t ‘logging’ iti pabawal da.
Ing karelang adwan at matning gulisak
Ding bunduk ban e la masira’t malasak,
Ding mangayntuliran anti la’mong maklak
Era darandaman, masikan a gulyak,
Inya ustung datang trahedyang maglasak
Kalulung memalen ding manga-pahamak.
Detang dagat ngara king balang sagipan
Ding ilug at sapa kekatang linisan,
Kanita ing dinat era na daralan
Kanyang libutad ning kadayatmalatan,
Ngana ning gagkas da iti ya ing sangkan
Inya ating albug king bandang kababan.
Ing sasabyan dang yan ya kaya ing tutu?
Ing bandi ning dagal o piglati ra mu?
Karelang timbakan king ba’lang mibubu
Telakad dang ‘building’ a anting tinubu;
Ing danum king dagat uling e mipagyu
Maglapo, maglagpas, miras king marayu.
Ing makabalita ‘tin muring programa
Ing kapamahalan ya ing pairal na
Ding dakal a dutung ngara itanam la;
Ing pamananaman nanung ulaga na
Nung ‘ting pamag-‘logging’ saka pamagmina,
Sisira king bunduk at naturalesa.
Aliwa mu’y SENDONG kekatang akakit
Indat ating bagyu, dakal manasakit;
Ating mangamate at era na ikit,
Inagus ning danum… iti ulit-ulit;
Mekad ing sangkan na, kelan malasakit
Ding sablang memalen ampon ding mumugit.
Neng ADORA GIGANTE-FERRER
Barangay Anunas, Angeles City
