Ing pamagmasusi king tune nang petsa
ning deklarasyon ning panga-bayani ra
ampon nung kaninu kareti talaga
mangaintulid mibie ing pamangilala
Bilang bayani a sukat parangalan
indat miras ing Aldo ning Katimawan,
pablasang angga na ngening salukuyan
yan binang malabug king kasalesayan.
Panaun na banting itulid ing mali
king meging papil antimong bayani
ban keta ing sukat king libru mibili,
itang makatud at alang pasubali.
Kalupa ning bili reting mesambitla
a nung kaninu mo’ pin karening adua,
ing tau Cavite o dagul Menila
ing tune bayani, balamu milisya!
Pablasang malino keng kasalesayan,
i Bonifacio ing talagang mipundar
king kanita inaus dang Katipunan,
at ining Emilio sinake ya bilang?
Iniasa’t nung kenu kari Bonifacio
at Emilio sukat mibie ing kreditu
ning Independensya, e pin ata ustu,
ing iti miputung kening Caviteño?
Kailangan mirinan pansin o ulaga
pati nung insanu ing talagang petsa;
Uli nung Agosto beinte tres ya ngara
itang “Cry of Balintawak” keng istorya;
A nung nu’ iti yang ‘birth of our nation’
at umpisa ning mapaling rebulusyon,
a penimunan na ning tau Masantol,
laban karing daywan a keti migsantung;
Akmulatan ta’ king i Don Emilio,
akabilang de ring Presidente tamu,
pero karampatan mu naman siguru
mibie ing para kang Andres Bonifacio!
At mibilang e mu meging Presidente,
nu’ne pa naman ya ing primerung dili,
pablasang i Andres aktual yang migsilbi
at king Katipunan yang mipundar iti.
At simsam na yatang Emilio ing dapat
mibie kening Andres a talagang sukat
mirinan papuri at direktang tanggap
king rekognisyon a king aliwa miras.
Katutuan, ing mika “Tejeros Convention”
a nu’ mepisabi kareti nung ninung
dapat manungkulan antimong peka-pun,
pero mengibabo ing ‘home-town-decision.’
Nanung paniambut na nining Bonifacio
laban karing Magdalo nang Aguinaldo?
Inya kemaulian ing Kabalen tamu,
pepaligpit na ne, pati i Procopio?
Tanggapan ta’na ing Junio a dose ya
ing kayaldawan na ning Independensya,
pero nung ninu ing tune menimuna
at tinulu daya ing dinan ulaga.
Inya panaun na karing mangagaling
a Diputado ken ing makapilub “Bill”,
king i Bonifacio ing minunang diling
meging Presidente – at aliwa ining
Lider ding Magdalo – nu’ pasari namu
ning pamilutlutan upaya – tinulu,
Ing dayang bayaning keta mesayang mu
king Cavite a nu’ ing bie na mepugtu!
