Maluat neng malsintang lihim ining Pisuk
kang Sion, a bunsu nang anak matuang Enuk,
A ing opisyu na, mamagtindang langguk
miayaliwang gule, aslam ampon baguk.
I Pisuk, agia mang alang pilming obra
nune kubrador mung jueting king baryu ra,
Aisip na niti ing pamakiasawa
at ini ping Sion ing akursunada’na.
Malagua’t salita, misan a tikatik
ing patak ning uran – aisip nang menik
Dinalo misan pa, ban iting matalik
nang sinta, ipasiag king pang-walung balik.
Kabang mi-arap la ren king lamesita
lele na ning awang, bale ning dalaga,
I Pisuk e mipain-datun keng lukluk na
kabang i Sion pane itang sisingut ya.
“Sion, marahil balu mu na,” nganing Pisuk
“ing sangkan nung bakit ing tinda mung baguk
pane kung papakion, pati na ing langguk
ampon aliwa pang malapit nang muluk.”
Timan-timan ya mu ing paglolon a Sion
kaba ping aplit yang didiga ing metung;
Angga king bili ren a maratundatun
bigla ating bala keyatdasan gulung
Ining Pisuk menga-palatut ya rugu,
Nan’ nemang aguantan mesikan pang lalu;
Inia keng dine na ta’nia miparuku
at keta anti yang mipakat king bangku.
Keng pamamigil nang mipakaili ning Sion,
ban i Pisuk e ya dumine maragul,
Ay rugo… linobo itang kayang sipon
a linual mingatba ring busbus nang arung!
King miliaring iti, ninu karing adua
ing mas makarine king milyaring bigla?
Ay tabalu, pero ing mas makatula,
ing kabud na ating tugak a sinapa!
