EKU BURING sabyan ing ala lang kwenta
At alang matinung gewa ring minuna
A mig-gobernador keti king Pampanga,
Nung inya anti kung asabing ‘the best’ ya
Karing kenu pa man a mengapauna,
Ing salukuyan a Indu ning probinsya
Nune buri ku mung ipasyag nung nanu
Ing pamiyaliwa ning pamangubyernu
Na ning masipag at malugud a tau
Ampon e kukupas a pamagserbisyu,
Ning anti kang ‘Nanay,’ a e ikit tamu
Karing aliwa pang milukluk king puestu
Ing kabas nang ‘Nanay Baby’ keng laus lub
Niting pamagsilbi karing keyang sakup,
Uling ya pelalung aldo e ra panlub
Keng obra ding kareng ‘public office’ lulub,
Ing malingap ampon matapat lulugud
A Governor tamu e paynawa alus
Keng kadudurut na karing sibabalen
Banting abalu na ing sukat gawan ken
King kasalukuyan a kabilian da ren,
Kalupa namo neng ing metung a balen
Kulang ya iskwela o alang ‘Health Center
A binang kailangan ding kayang memalen.
Lilibaran ne ing mabilug Pampanga
Lalu pa’t neng ating sukat lingunan na
A e na malyaring ipagbukas pa;
Kalupa na alimbawa ning problema
Keng albug ampo pang aliwangdisgrasya
A posibleng maminsala king probinsya
At e mu bukud king makanyan a bage
Ayasahan da ring memalen ing tune
Lingap at lugud na a’yalang kayarle;
Pablasang ing kaya tutung madalise
At e kaplastikan king anyu at aske,
Inyasa’t ding sabla apanaligan de.
Ninu namo karing meging Gobernador
Keti Pampanga ing kusa nong’ tinipun
Ding Aetas, banting adinan na la mung
Pamaskung regalung y Gob pa ing mismung
Personal memye ken karing balang metung
Manibat king abak anggang gatpanapun?
A nu’ balamu yang alang kapagalan
Y ‘Nanay Baby’ keng makabang lakaran,
Kambe ring Mayors ding lugal nang pintalan
King keyang pamamye Pamasku ra bilang
Ding Aetas karing ken king kabundukan
Ning Floridablanca’t Porac manuknangan.
At ninu mo’ pin ken karing aliwa pa
A meging pun-lalawigan ning Pampanga
Ing ginawa antimo ing ikit tana,
King mal tang’ Governor Lilia G. Pineda
Keng panaun na ning pamanungkulan na,
Kumpara kenu mang linukluk kanita?
(A nu’ ding aliwa, yan mang aldo Lunes
E re pagpilitan ing luban deng pilit,
Partikular na ken ding mitatang Lapid;
Madalas e mo man akapkap keng opis,
Pilan besis ka mang magpabalik-balik,
Inya marahil den e no’ maka-ulit
Sakali’t balakan da mang miuman tagal
Karing paintungul a panaun pang datang,
Antining mulat no’ ring kalalawigan,
Keng pamipuk tune magobra’t gugusal
King takdang tungul da para king balayan,
A kalupa na ning gagawan nang ‘Nanay!’)
