I Pedro kilub ning aldo-aldo panlub na
King karelang klasi parating tawli ya,
Inya ngening abak ya pang kasiro na
King ‘classroom’ sebyanan na ne ning titser da.
“Obat parati kang mitatawli, Pedro?
E ka pa din’tang e lampas alas otso!
Nung pane makanyan nanung abalu mu
Karing ‘assignment’ a aldo-aldo babie ku?
“Panupaya yu Mam, e na pu maulit;
Bukas, agyang ala pa pung alas sais
Ipangaku ku pu miratang kung pilit,
At e na mag-absent umpisa keng Lunis”.
“O sige, pero ba’kung lubus abalu
Ing ika king kakung aldo-aldo tuturu
Ating agyang ditak mu mang ababalu,
Wayni ing kutang a anseran mu pamu”:
“Ninu ing kekatang pambansang bayani?”
“I Jose Rizal pu Mam!” (pakibat piragli);
“Tsamba, ngeni ka pa mu e migkamali”
“Aku naman pu ing mangutang saguli”
“Kapamu, aku ing pakibatan mu pa
E mu lili keng nanu pa mang paksa
Ing kaku dapat mung malinawan kusa,
Obat Pedro, mumulangan mu ku ata?”
“Mam naman buri yu ikayu ing ustu
Kabalwan king nanung bage tuturu yu
Kekami, at ikeng kekong disipulu,
E ra ko akutnan?” ngana nining Pedro.
“Wa sige, nanu ita” ngana ning titser da:
“O ninu naman pu Mam y Atsing Donna?”
“Tabalu…ala kung kakilalang Donna!
At ninu wari yan e’ke kakilala?”
“Oyan, masasabing matalinu kayu
At sobra kasipag keng pamanuru yu,
Pero nanu naman kaya ing balu yu
Inggil keng bisyu na Mam ning asawa yu?”
“Bala ku mo pu Mam asna ko’ kabiasa
Pero ing katutuan baligtad pu pala;
Kasi simpling bage dapat balu yu na
Angga ngeni e ye lubus kakilala”
“Ninu wari ining Donna’ng amanwan mu?
Ngeni ke pa dimdam ing lagyung yan Pedru”
“Mam, para sabyan ku ing tutu kekayu…
I Donna, kabit ne pu ning asawa yu!”
