“TAKDE ning menasik ya ing alang pale,
Ginawa king templo ya ing alang bale;
Minerung kinulkul bakal, gintung lante
Ila ring king utang makakutkut pane
Talapagobra keng pabrikang imalan
Ilang lubas, alang isulud nung misan;
Makipanginu keng negosyung pamangan
Ila ring madalas mangalukguk atyan”.
Iti amanu nang Amado Hernandez
Lider ding keng obra karen mipagkait
Ing karapatan da laban karing switik
At kapitalistang mapamiasa’t ganid.
Nung nu’ nanan da na e ro’ bayaranan
Sapat ding magobra, ban ing panakitan
Den king negosyo ra, antimong tityupan
Kapamilatan ning sobrang kapamyasnan.
Iting lerawan na ning mapuring tau
A makimasabal king bie ring kalulu
At talapagobrang kapurit mu sueldu,
Yang kanita peki-paglaban nang ustu.
Angga king kesukul na ing babatikus
Na king gubyernu ing ngana e makatud
A pamalakad ding keng ‘labor’ pakimut,
Dapot ditman e re apagalgal intud!
Oyan, angga ngeni ing Talapagobra
Makasakmal ya pa murin ing batal na,
Karing alang ampon mapamiasa,
At alang pikabsyan a kapitalista.
Keng ‘contractual basis’ a nu’ agiang ditak
Ala neng tsansa ban mipirmi at sukat
Keng obra ing taung nu’man anti kayap,
Pasari namu ning antiting palakad;
Nung nu’ mas matindi pa kesa kanita
Ing kalakaran a mas mangibabo la,
Deng mabandi karas keng panlalawe ra,
Ding aliwang lider a silo keng pera.
At nung nu’ ding otor a maki-pasari
King antiting batas, malino kakampi
Ding kapitalistang kalupa ra uri,
Alang pikabsian keng krus ding salapi.
Nung inia marahil nanan da na reti
Iting kapamiasnan lubus manatili
Angga king ila nang mie king yatung iti,
At ing anak-pawas mate yang pulubi.
Pilan nang ‘Labor Day’ keti ing milabas
A nu’ ring keng sektor deti gugulisak
Ing kalakaran a dapat maging patas,
Pero ing ‘DOLe,’ daig ne pa ken ing maklak!
Ing ‘contractual basis’ dapat nang mabura
Ban ing ‘security of tenure’ tatag ya;
At e anti ngening banting alisyan da
Ing karapatan da ring talapagobra;
Ilako re agyang biasa ya at alang
Gewa a nanu mang labag panuntunan,
Nu’ne itang e ria buring miregular
Keng obra, at ba’neng alang pakibatan.
Potang mag-retiru ne’t ing obligasyon
Ning ‘employer’ para king pakakalulung
Empleyadu e na ne dinan agyang nanung
Paragala, agyang tagal ya king ‘Labor’.
Panaun na banting mapatpat nang lubus
Ing kapamiasnan ding keng ‘labor’ pakimut;
Inya kang ‘Sec Bello’ tamu manyad saup
Ban ing ‘Security of Tenure’ ing lunsut!
