Kanitang minuna ing kanung balawe
king babaing manuk milsinta yang tune;
At uli ning keyang lugud a dalise
singsing ng timpukan king irug ne binye
Nganang migsalita ning ari ding ayup
king keyang kasuyung dumalagang manuk,
“Ing singsing kung ining keka ipagkalub
tanda ne ning kakung masapsap a lugud
Ing singsing kung ini ing penibatan na,
ing pipumpunan ming i Aring Agila;
At pablasang aku ing talapagmana
kaku re pigkalub ding kanakung matwa
Pakatandanan mu nung yan ing mawala,
ining kanakung bie mibalut yang lugma,
uli na pin nitang tagle niting sumpa,
king mipagkaluban kanyan manibala
Labug lang bagya ring kakung panimanman
angga’t e mayakit singsing a timpukan;
Pati na ring lai ning kakung dininan
takman lang parusang dusa’t kamatayan”
Dapot misan ikit de iti ring matsin
Pilit deng kinwa yan at pilaying tambing;
At kabang aplit la reting mamagbaging
atabili re at anakbag king bangin.
Iniang pasibayung mikit la ring adwa
mata ning balawe melabug nong’ bagya;
Simbung na ning manuk king ayup nang mutya,
ding matsin ngana ring king singsing kinangwa
Ngana ning balawe king manuk mekibat:
“King milyaring iti mie ku king pagsalbat;
Maging ding sisi yu e la rin miligtas
kareting kuku ming sobra king katalas
At deta mang matsin takman lang parusa,
karelang pagsisyan kabang mabibie la;
Uling ing katumbas ning depat dang sala
kamatayan mu rin karetang agila
Patawaran mu ku nung saka-sakali
ating madagit ken karing kekong sisi;
Milako ing sumpang king singsing mibili
nung akit ye iti at kekong asubli”
Inia makanian lang kakalkal ding manuk
uling pantunan de ing singsing ning ayup;
Deta namang matsin king sobra rang takut
karing kagubatan la mamanyalikut….
Vhelle V. Garcia
March 14, 2013
United Arab Emirates
