1.
Anggiang potang saluksuk ne ing aldo karin albugan,
nung kapilan ipiak mo pâ ring mátá mú o! lelangan;
ing Sikanan a gagalo king mabilug a sikluban
e pa’inawang mamalale king durut náng alan-anggan.
2.
Ding lasip ampong tanaman at ding batu karing bunduk,
angga karing sablang bageng atiu sarili dáng suluk;
deti e lá mililiwan king lingap náng sakdal lusuk
ning laganas a Sikanang mayupaya’t mataluktuk.
3.
Pagumasdan me’ing babagwâ king amak náng kayatinan
masdan ka at mipatiman king bale náng lalalangan;
ala yáng gamit nanu man, ala yáng metrung sukáran,
ding sukad ná at pilatan ning bale na saktu lá ngan.
4.
Iting malating lelangan e me kalupang megaral,
king gawa ná daig nepâ ing inhinyerung marangal;
ing saput king katawan ná iyâng gamit nâng papalwal
inya e yá balus king bie kalupa mung taung siwal.
5.
Karing gubat detang ayup a e naman mamagobrá,
ing balû ra maglimbang mû nokarin la man mibandá;
mamyalung lâ’t libut-libut, limpad-limpad, kanta-kantá,
e lá dit man mamagsalbat nung nu kuanan ing kanan dá.
6.
Alben mu lá king karelang masampat a pamiutus,
dumine ka ikang tau a maglupa mung busabus.
Karela alang inggitan, ala lang babandian lubus,
ing pamangan dá laganas, alang mamanyawad limus.
7.
King marangle lon mu noman ding menubú múng sampagá
alang karela tinanam, lilingun at mamalalá.
Dapot king leguan dang tagle at king ningning ning kulul dá
malumà ing mengayaring mitmung kamal a alpombrá.
8.
Makanya’no ping abanggit ning maestrung mipanuanan
detang lily ketang parang a mamimblas king kamalan;
anggiang i Solomon a nuan e meg-imalan makanian
ban keka ilarawa’ne ing Lalalang a Sikanan.
9.
E lá naman mipaburen detang batú karing bunduk
uling ing Puwersang gagalo, lilingapan nalang lusuk.
Ing ulaga ráng tataglen e mu ngan talus pà’t subuk
matibe rong salelayan ding palasyu rá ding tampuk.
10.
Palamuti lang gamit mu karing tànggàpán at balé
deting lalang ning minunang Arkitektung matagumpé.
Ding mangamal múng giginuan a diamante’t gintung kiké
obra nala ning Sikanang babie tulâ kekong mabié.
11.
Ing tanamang alang isip a mabibie mùng tajimik
menibat king bining pipis a ketang gabun miyasik,
potang iti tumubu yá, manyanga ná at maglawit,
karing bunga, ding sanga ná, mangatmù la’t mamutiktik.
12.
Ing mamilug náng pinunan nitang pale king asikan
a miminum at mandilu king ambun ning kayabakan,
king aplus ning tyup ning angin ibait ne king kabengian
ing gintung butil ná ning bie a pamangan ding kekaldan.
13.
Mamin lá tintá ring plumá nung isulat ngan ing sablâ
ban masalâ mo sàng akit detang makapagmulalâ.
Dapot nanu ing migit páng malino náng talimjagâ…
migit king bie múng lelanga’ning Sikanang babie malâ.
