I
Adwa yang klasi ing puna nung kekatamu yang surian
a sasabian da ring tau king nasa rang pataniran
ing mumuna apin itang pamamuri king kayapan
karing masanting a dapat ding karelang patungkulan
at ing kadwa naman ya ing batikus at katarusan
mangaparas a amanung matsurang pakiramdaman
II
Detang punang sasabian dang king dangalan makasirâ
karing tau a darapat king bage makasukmamâ
ing makaniang pamamuna e ra dapat ikakamwâ
ding ninu mang manungkulan at dapat dang ikatulâ
uling ing buri nang sabian detang taung magsalita
mulat na la king katutuan at makagising a diwâ
III
Dapot ustung betikus de ing taung darapat mayap
yan ing klasi na ning puna a e na katangap-tanggap
mengari ya iting lasun a king diwa makapakat
a tagle ning pulitika a milalu king karinat
uli ning idelohiya ikua ra waring mebulag
ding karelang panimanmang mesira na panimalad
IV
Detang pulitikung tapat king karelang katungkulan
ampon maserbisyung tutu ilang dapat tamung purian
dapot detang mangatako at lamirang manungkulan
katarusan mang amanu karela e karampatan
pablasang king pasari na ning karelang katakawan
ding memalen at balen ing kukusad king kasakitan
V
E uling kaluguran at kapamilya me ing tau
pabustan me at kusintian karing dapat nang e ustu
ding memalen nung wari sa king metung a mangutseru
ila pin detang magrenda king simarun a kabayu
ustung e re apatunud king balasbas ning latiku
dapat da neng alilan o pisali king mamulkeru
VI
Sana retang manungkulan e ra binang kabubugnut
karing likoru rang dapat nung atin mang babatikus
nung kapurian ing nasa ra a karela mipagkalub
ipagkalam da king balen ing serbisyung mipnung lugud
dapot kabang manakit la karing gawang e makatud
ding masa king pamamuna e la tuknang at patugut…
