Ume neng ne sang’ tikdo keng pangasiklod na
Ing metung a pulis kaibat na ning misa,
Pero king uli ning dakal lang sinimba
Metigagal bagya ing lumual ne sana.
Mipaintagun lele liklukan nang bangku,
Dimdam ne’ing anak a banayad manguku,
Atingiran na nyang banayad yang duku;
Atin yang king Ginu ipangadi rugu.
Pakakalale yang king anak linapit
Pekiramdaman na ing kayang tatangis;
Apansinan niti e la mipaparis
Ding sinelas nyan karing kayang bitis.
Malino dimdam na, “Dios ko, saupan mu ku
Ban makasali kung sinelas a bayu,
Agiang dinalan mu sana dinan mu ku”
Nganing pakisabi na king Apung Ginu.
King dimdam ning pulis metagkil ya pusu
At migbalik ya king liklukan nang banku;
Aisip na niti ing dinan na niamu
Sanang dinalan yan ban e ya mabigu.
At king sarili na aisip nang bigla
Ing ya ing ginamit na ning Dios a Ibpa
Bilang instrumento king ban yang tumula
Ing mesabing anac, king bie nang malugma
Begut ne’ing pitaca na’t saka binilang
Ding pera na pala sactu lang dinalan
Makananu kaya? nganang minisip nyan
Nung ibye ku la ngan ala nang mitagan”
Inia ing depat na, kinua ne ing beinti’
Ban ating gamitan, muling mamasahi’
At mekad ngana pa, ring ibie kung deni’
Apanyali na nong’ sinelas na niti’
Inaus ne’ing anak, saka no inabut
King gamat na niti ring otsenta pesus
At kaibat ing anak ikit neng mengurus,
saka ya mengadi arapan nitang krus;
Guino, salamat pu kaniting penandit
A dininan mu kung pera ban agamit,
Sana keng tutuki e na pu keng pulis
Yu la iparala ban e la makupit!
Vhelle V. Garcia
June 26, 2013
Abu Dhabi, United Arab Emirates
