1.
Ing metung a pulis talakad ne sana’
ban munta istasyun kayari ning misa’
dapot neng daka la ring taung sinimba’
pepabustan na nong munang lumual kaya ‘
2.
ketang malapit king liklukan nang bangku
gulpi neng dimdam ing anak a menguku
tutulu ing lua na niting pakaduku
arap rebultu ning Kristung makapaku
3.
Pakakalale yang kaniti linapit
pekiramdaman ne anak a manangis
tambing nang ayalak ela mipaparis
sinelas ning anak karing kayang bitis
4.
Matni niting dimdam “Dios ko saupan mu ku’,
ban makasali kung sinelas a bayu’,
agiang dinalan yang pesus sana Guinu,
pagkaluban mu ku”, nganang manigapu
5.
King dimdam ning pulis metagkil ya pusu
at ume mibalik ketang kayang bangku
apibalak niti king dinan na nemu
dinalan ing anak ban e nia mabigu
6.
At ngana pa niting mipaisip bigla
ya ing ginamit na ning Dios a Dakila
bilang instrumentos king ban yang tumula
Ing mangading anak king biling malugma
7.
megut yang pitaka saka ne kilkalan
ding pera na saktu la mung dinalan
makananu kaya? nganang mimisip nyan
nung ibye ku la ngan ala nang mitagan”
8.
inia ing depat na kinua ne ing beinti’
ban ating gamitan muling mamasahi’
at mekad ngana pa ring ibie kung deti’
apanyali na nong sinelas na niti”
9.
Inaus ne’ing anak saca no inabut
king palad na niti ring otsenta pesus
at kaibat ing anak ikit neng mengurus
saka ya mengadi arapan ning kurus
10.
GUINO salamat pu, kaniting penandit
king binye mung pera a kakung agamit
sana king tutuki ban alang mangupit
e mu yu no pu sana PADALAN KING PULIS
