Itang keyang pusu ikwa meng agili
inia kinirut yang asna king kasiri
at angga man ngeni e pa man mibawi
king kesaldakan nang malungkut a bili
King amuyut na ning pamalsintang bawal
ing keka linugud keka yang gilutan
dininan mung batik ing keyang dangalan
a e na milako king kapilan pa man
Nukarin ya’ing sumpa a kekang binili
arapan na ning Diyos king mibusning labi
lubid at kandila a migsilbing saksi
bakit agawa mung ken ka tinabili?
Pati ing bunga na ning pamikalugud
a pepasuswan mu king salu mung matbud
ing sadiang tula na ikwa mung apatlud
at ketang pagsalbat maybug neng mapuput
Ing likwan mung pugad mistula yang tukil
alang laman kilub nune purus angin
ing kataimikan a mig-ari karin
karinan de wari detang pakalibing
O anak nang Adan a kinet mu naman
king pigmulan na ning manang kasalanan,
ika na sana ing tawling makatakman
at king pauli mu akwa nang magisan
Para ban kanita ala nang matuksu
kuminis king prutas ibat paraisu;
sana pati butul pakalasawan mu
ban e ne mipunla iting pasibayu
