1.
Neng milalu kamal ing presyu ning abias
dakal nong pamilyang sasala king oras
buri da no yatang king danup mangasyas
kalulung memalen keti Pilipinas
2.
Sukat na kanitang mababa pa’ing presyu’
mangasakitan no ring dakal a tau’
e mu ding kalulu deting magreklamu’
pati na makuwalta keti kekatamu’
3.
dapot ding mumunang diling mituturan
ding pakakalulung dimut a kabyayan
pablasang ing agyu da reting saliwan
itang pekamurang abias king tindahan
4.
E da kalupa ring dakal a panyali
king manyamang abias agyu deting sali
agyang ing ulam da paksi mung gurami
mayaga lang mangan neng wagwag la nasi
5
Ding kalulu rugu ing nasi rang tu tun
e ra maybug kanan neng babaung meum
lalu nung ing ulam laga ya mung ebun
magkang e no langut tambing dang iyakmul
6.
sabi ning gubyernu meritak ing pale
pauli ning albug karetang marangle
dapot ing tutu na gisan dang dinake
king aliwang bansa ding alang marine
7.
Ustung malapit nang datang ing kauran
malagad ing paleng lawta makatanam
uling ding manasik balu dang iwasan
ing albug pasari ding bagyung daratang
8.
makananu da mong panwalan ding tau’
a kulang ing pupul deting ortelanu’
ken pang sentral luzon libu-libung saku’
paleng papakyon da retang intsik behu’
9.
ing sasalwan tamung abias king palengki’
a bukud king mal na, mababa pa klasi’
pisamut-samut da deting negosyanti’
miyaliwang paleng awsan dang variety
10.
uling isipan da mapilit tang sali
at karela tamu pa mu rin mulai
manunggal mang kaban o patingi-tingi
gumamal la mu ring dakal a salapi
11.
nung mika-krisis man kanita king bansa
iti e ya sangkan ban i tas dang bina
presyu na ning abias neng e pa bitasa
mete ing produktu karetang taldawa
12
Abias a manibat king marayung lugal
neng matsura klasi mura dang sasalwan
ti tas da mu presyu ban lang manakitan
dening negosyanti a tutung lamiran
13.
king sistemang iti nu ta pa magwanta?
nung ken pamung abias magisan ka pera’
deting gugubyernu makapiyak la mata’
karing negosyanting mapanyamantala’ ….
