MISTERYU
1
Malati ku pamu dakal nong kutang ding sasalibusub king mura kung kaisipan,
a e ku akutang karetang matua kung eku buring dinan kapigaganakan;
kareti ing kakung parating isipan, migdala king lub ku king kaligaligan
ing kakaluluan ming kakung agisingan ketang mabayat ming aldoldo kabyayan.
2.
Ing e mamako king kaisipan kung lingo ya ing maliliaring kaku e malino,
a maging misteryu at kutang a sasyo king bubut kung diwang bina pang mababo,
potang king aldoldo akakit ku’ing bie ming e migalo-galo king dusa maglapo
kabang ding makwalta atiu la king babo, magpapasasa king sabla-sablang layo.
3.
Karing pamung baleng panuknanganan mi akit mung masala ing pamiyaliwâ,
ring karing mabandi malapalasyu la’t mangamal lang bina king aske ra’t gawâ,
samantalang ketang dane ring malukâ, atiu ing bale ming karinan ding alâ,
pinaud yang sirâ a penakpan mi mu king pitagpi-tagping gamit a melumâ.
4.
Potang itang angin susyuk nang masikan, ing bagyu at uran atiu nang paratang
ta’keng makisuyu karing siping bale, ing bagyung masikan e ra man pikabyang
ban ketang kabukas e ke miuranan king sira-sira ming baleng mibuyangyang
king bagsik ning angin at ning digpang uran king bale ming karin migyuyu’t giniwang.
5.
King tagulele ning kealan kung male ing kakung asambit ot makanian ing bie?
obat ating karing gintu makasale, a king kayatinan masayang mabibie?
kabang atiu kami king dase ning lumbe a magigimate king pangagulape,
ing kakung akutang at abule-bule, obat makanyan ya’ing Dios a mamatnube?.
6.
King kanakung kutang alang ninuman ing mekabie pakibat nung nanu ing sangkan,
uling ing beluan da ring tau king yatu pira-pirasu mu’t kulang a kulang ngan;
nung inya pentun ku ing kapakibatan karing kutang ning bieng kekeng daralanan,
karin ku abalung atin yang pigmulan ing pamiyaliwa ding balang kabilyan.
7.
King kakung sarili e ku atanggap ing sasabyan dang ing Dios ’ya mung makawarî
a anggiang kapilan e ta ataruk ing sablang maliliaring Ya mung makiburî,
nung inya ing keka tinulid Nang bilî… nung kawe ka man king dayat ning palsimî
amiaman mu namu anggang katataulian uling ginulis Ne ning gamat nang sugî.
8.
Kakung abitasa ing bie tamung ikwa, maskup yaman iti o kaya manawâ
bunga nia mu iti ning kekatang gewa karing napun tâng bieng miglakbe timawâ,
atin ketang misan pinili na’ing salâ nung inya king ngeni atiu yang masayâ,
dapot atin namang king dalan linisyâ, king kasakitan ne dela ning agawâ.
9.
Ing Dios kap’lan man e mekipagmananu, e Ya bibye tungul
kaninu mang taú,
atiu kekatamu nung nanu yang bie ing buri tang pagkabie babo na ning yatú,
timawa tang gawan ing balu tang ustu ban ing kekatang bie magluid ya’t miyatsú,
kaibat ing king Guinu atul yamung bate karing gewa tamung myaliwang misteryú.
10.
Nung inya ing kabas ding misteryu ning Dios ila ring depat ta karing bieng milabas,
bunga do ring napun a ngeni ta tinggap ban mibalangkas ya ing kekatang bukas,
ding dakal a bukas a pagkalub na ning kaladwa tang mantun kabiasnan a wagas
a papaibat karing gawa tang mangayap a sunlag masala king Ka-ariang matas.
11.
Eata ring dusa at ding kasakitang binye na’t pepabal ning Guinung Miglalang
mana tala reti a menibat karing mebie’t mikatawan, king gawa migkulang
nung inya ring kulang a megi rang keinan ilang kekatamung sibukang mibilang,
ban king katataulian… king tagumpe tamu…ding kaladwa tang nuan ila ring numabang.
Pisanggunian:
*
Adamantius Origen, 2nd – 3rd century church father and been called the Prince of Christian Faith (184 – 253 A.D.) who said: “Every soul comes into this world strengthened by the victories or weakened by the defeats of its previous life” (De Principiis).
**
Jesus the Christ who said: “Ye shall know the truth, and the truth shall make you free” (John 8:32 KJV).
