Pabanua pa alus bayu miras, datang
ing local election mabilug kapuluan,
pero ngeni pamu atin nang sasamal
ban keng 2013 maninasang tagal.
Partikular karing kasalukuyan ken
a mumugit bilang Alkalde ning balen,
Vice mayor, Konsehal, Provincial Board Member
ampon aliwa pang galame pambalen.
Nung nu’ pasari ning ausan dang ‘premature’
a pamipasyag at milalu karanun
a panga-indorsu ding mipapartidung
kandidatu bilang Alkalde’t Vice Mayor,
O nanu mang tandem ding balang partidu,
bilang Gobernador, Bise, Diputado,
deti mamit-amit lang mipapagtampu
kabud king set-up da mika-pamagbayu.
At ating aliwang tandem a mibubu
king e na male man o bitasang balu
nining kabud da na inalilan rugu
a kasangga na ning minuna rang bibu.
Natural mu syempre ing maginakit ya
o magtanam mua ing mepiling minuna,
ngening iting grupung kayayaniban na
anti re mo waring gewang alang kwenta.
Iti, e mu pilan ukdu nang milyari
karing miayaliwang balen ampon city,
a nu’ ing minuna a pisyag da reti
bigla rang sinira inyang bandang tauli.
Yan ing e masanting keng sobra karanun
papalual ngara pin nanu mang ‘premature’
a kapasiagan ken inggil keng eleksyun,
uling masira mu, pamikakatagun
At malasak lubus ing eganagana
a sadyang yumu na ning pamiyabe ra
king matinding pait a pepaukuk da
ding e na ukulan maging kasalang na.
Ninu mo pin namang taung e masugat
a kapanamdaman king bage merapat,
pasari namu ning isipan da mekad
king ining pelit da mayap yang e palak
Samantalang magkang ining pemalit da
e man aktibu keng pamanungkulan na,
nung kening pelitan tamu ikumpara
ing ‘attendance’ niti ampon pamagobra?
Ing mumunang lalon karing pulitiku,
ya’ytang aktibu la at mayap a tau;
At e personal dang interes o nanu
itang mangibabo keng pamagserbisyu.
At ing ‘performance’ da e man pamalita,
mayayakit lubus king karelang gawa;
(At mialiwang ‘awards’ a karelang ikua
keti at ampo pa king aliwang bansa).
Kening opinyon ning kekong talasulat
ala yang direktang paturan at sukat,
Nune pagnasan nang king balen ayatad
ing bage-bage a kailangan masukad.
Pablasang likas na ing bage mesabi
karing keraklan ding pulitiku ngeni,
itang balamu ing karelang sarili
ya kabud imbut dang magbabo parati.
O talagang iti ya’nang kalakaran
karing pulitiku ngening salukuyan?
At nung nu’ ing ‘game of politics’ ya na ngan
ing paralan banting mipuk king tungkulan?
