Akaugalyan da na ken ding aliwa
ining balang ating alalan den kusa
lang lilibutad ban sakali mikalma
la reting sumambut, ing bie ra mipala?
Inya maski ninu namu maki-alkas
tatagal uli ning biasa lang sumulat
at mamasa pihung karen alang sabat
ban mag-‘file’ C.O.C. king Comelec agad.
Pero nung ikutang tamung tunggal-tunggal
kareti nung nanu ing agyu rang gawan,
balu ra mo kaya ding mapilan mu man
itang bage-bage dapat dang gampanan?
Sakali sumambut ya’ing di’pa ning mayap
a e tula – at dakal ya kamaganak
migbotu keya n’ya migwagi ya mekad
kapamilatan ding kaya ken mitulak.
Antimo i Paquiao, a kampyon keng boksing,
a ngeni, oyan at kabilang de rening
kinandidatu a maki-tagle galing,
kumpara king keya, kulelat yang tambing!
Inya naman pawang ken kapintasan mu
kang Paquiao ing matas nang paninap rugu,
at nu’ imbes puryan de’t maging malagu
ing komentu para keya, lulto sunu.
E uling disan na ing meging ‘congressman.
senator,’ at nu’ya iti mas meyabang,
pati naman wari ing pang-Malakanyang
a puestu buri na niting pakirasan?
(Angga na ka mu ken e na ka maninap
maging presidente na ning Pilipinas,
uling muna, e mu agyung maki-arap
keng pang-unibersong pamakitalastas).
Antimurin dening keti kekatamu
magnasang mugit king kekatang gubyernu,
bala ra galang den mayan a opisyu
ing maging punbalen o nanu mang puesto?
E simpling obra ken ing maging alkalde,
bise o konsehal king panahun ayti,
uling bilang ‘public servant’ e malyari
ing lungub kang Lunes; anggang Biernes, ali.
At e kayu kabud ken makatulaklak
king opisina yu ‘lub ning walung oras,
at e itang karing ‘staff’ makikatak
uling dakal kayu ken sikasuan dapat.
Kalupa na pin ning mayor, alimbawa,
mangaintulid mu ing bilang Tata, Inda
ring memalen dapat tang pakit ganaka
at maging masuyu arapan ding sabla.
At nung makananu kang mayumu timan
inyang tatagal ka’t mang-‘harana’ bilang
makanyan mu naman sana ing tañgalan
mi kekayu potang kaybat ning alalan.
Dakal la kasi ken ding maganaka mu
neng mangampanya la, asno’ kapanatu;
pero kaybat, magka-amnesia la rugu:
king bie pulitiku – yan sukat idayu!
