(Kaugne ning pamangambul, pamipalabung at pamanyese king Amanung Sisuan, a ngeni panimunan ding bibilug king Parnasong Kapampangan lalam nang pamangasiwa ning mapuring Ari ning Parnaso, Renato Alzadon, banting manatiling mabie king danggut dang dila ring balang Kabalen, busten yung pamisan-misan ing milimbag la keng PUNTO Central Luzon News ding kawatasan a sinulat ding ding makatagan pang Poeta ning lalawigan Kapampangan. Iting poesiang pagnasan ming yampang para king malugud yung pamamasa, migale ya king istasyun ning RW Radio 95.1, king Siyudad ning San Fernando, ketang Marso 8, 2014. Atin yang regular a programa ing Parnasong Kapampanganking mesabing istasyun a mararamdam balang Sabadu manibat king oras a alas 2:00 anggang alas 3:00 ning gatpanaun).
MAYAP A GATPANAPUN pu kekong sablang kabalen ku,
At lalu na king magiting a announcer na ning radyu;
Iti e ta’ sasalanan balang aldo ning Sabadu,
Kakablas king lalawigan, siwala nang Boy Santiago;
Antimurin ding matapat at masuyung magserbisyu,
Doy Gigante, Dolly Ferrer, magluid sana iting bie yu.
Uling iko ing sagisag anting mabie nang larawan
A pasulung king bukas na ning Amanu tamung Sisuan,
Ngeni atyu mayayakit babangun yeng pagpilitan,
Sasane yong alang sawa ding diwa ring kayanakan;
Pagmasakit yeng bibekut, mibabatang kapagalan,
Ban miuman yeng apatindag ing bukas nang paintungulan.
Keng mayap yung kapagnasan dakal la ring susuporta,
Metung ne ing beteranu a makudtang Felix Garcia,
Indang Ofring, Totoy Balas, Pol Batac ning Sta. Rita,
Saka y Catherine Lapuz, Frank Guinto ning Sta. Maria;
Dakal la pang miyayaliwa a poetang magbisita,
Babie usuk pamigale keng istilung delanan da.
Ninu waring e mawili, suporta at ma-engganyu
Keng sampat na ning programa, babie sigla karing tau;
Keni ating tutulu lua, kikiak anting desperadu,
At daralit maligaya kipmuan diwang makabersu;
Ating gale babie aral at dalit ning balen tamu,
Makarikil ngang mistula king ginintuan tang Amanu.
Keng sampat ning programa yu ala na kong’ akapante,
Ing lugud yu king kultura sisesen yeng masalese;
Ding tuturuanan yung anak keng tonu ra’t pamigale,
E na lumuat kamtan tamu ing maningning a tagumpe;
Keng lingap yu’t pamibata at pawas yung sinagese,
Ing Amanung Capampangan e ne matda yan kabang bie.
E ra busten ing Amanu malakuan yang makabusal
King saug ning kalmang bigu at pait ning kalmang siwal;
Ing buri ra lukluk da ka ketang Tronu pakasandal,
At layun dang pagtumaila ating Reynang sari kamal;
Dening anak mung poeta ‘duyan daka king pakamal
At karing danggut dang pluma sabitanan dakang dangal.
Mapalad ka Capampangan, mapalad ka o balen ku
Atin ka pang makatagan a malugud pang anak mu,
Ing amana ming Salita, matatda ne’t mag-ingalu,
Anak mung Rene Azadon, kimbilan ne at siklulu;
Dininan na kang siwala keng istasyun na ning Radyu
Ban lunto ya at mibangun ing palsintan mung Amanu.
Agyang atyu keng marayu dapot pilit yang magbabo
Ing lugud king Sabing menan, keng isip na e mamako;
Bibyayan neng anggang binit, malugud neng pasulapo
Karing anak Capampangan atyu ngeni magparayo;
Matula lang pasalamat keng masabal nang papalto,
Mr. Renato Alzadon, budning Ari ning Parnaso!
Diosdado L. Mallari, PL
Barangay Sta. Maria,
Macabebe, Pampanga
Pebrero 12, 2014
