Metung yang akasya a sadiang malagu
Ing pemalenan na ning metung a Paku,
Kekaban ning aldo nu’melabung lalu
At miniuling dakal iting mekisuyu,
Ya’nang alang linto mebie nang lanubu
Angga king ikua nang mibalut a salu.
Ing sustansyang ibat king matabang gabun
A maging pamangan ning mesabing dutung,
Yang sisipsipan na king bie nang maratun
Ning liling Paku a keya migdatun,
A e magdulap mang king keya manintun
Milalabas ya’yti kilub patingapun.
Kalulung pun’duting a keta mamitbit
King mesabing Paku a melabung aplit,
Pilan mung panahun ikua nang matiktik;
At melangi pati sanga nang mesipit
Inyang midalamat kirga nang pasakit.
King bie na ning tau makanyan mu naman
Madalas miraras ing bage ing anti yan,
Potang itang sampid a kabud na din’tang
Mapait ya pa keng apalya nung misan;
Pakabitasan mung e mikabla datang
Mekad mu ika pang magdusang papakan.
At uling nung misan deting makisulut
Ila pa keraklan ding intindian lubus,
E mikabla ika pa ngara pin kabud
Itang makibage king asal da’t kimut;
Banting e kayu mu miras ketang maskup
At ika pang lunto e biasang makiutus!
