Ing obra nang Patdu
purus mung pamalak, palus at magadtu;
Mapad keng labulan
palpakitua neman ketang ena balu;
Potang matukal ya
at saka mangasuat, manga-buku-buku,
Magtalakasdan ya
ere man kukutnan kabud nya tatangu.
Ala nemang bandal
king pirurungutan agad nang paysubu;
Talagang lumo na
ing maniningaya at magbural salu.
Misan king umpukan
ding lalaking ‘Supil’ apisabi da la;
Mikatagun naman
ing lalaking Patdu kabud panyatang na;
Tambing nang sinalud
masyas mengamanu libung mate naya,
Enamu tulutan
ing mitagurian ya me-”under the saya”.
King dimdam dang iti
pitaru-taru de ding kaumpukan na;
Lalu yang megbural
mesikan a boses king paningaya na.
Oneng karyablusan
ing pamikatagun meki-sabwat wari;
Dimdam ning Misis na
piswitan ne’y Patdu sininyalan muli.
Meglingus-lingus yang
linele king eran minuyat piragli;
King panga-sermun na
nanan me mo itang mebingbing a sisi.
Merine ya ata
megsigam-sigam yang king suluk migkubli,
Silip-silipan no
ding kaumpukan nang sasagakgak matni.
