Misan karin mental, ing metung a murit
king awang a rehas gulut makasilip,
ding balang lalabas a keyang akakit
kukulaitan nala king pinu nang paswit
Pablasang misane no’ kaya ding tau
nung iniasa’t iti e ra ne sikasu,
neng makakulung ya ela mamiligru
ding residenti ning nuebi de Pebreru.
Dapot ketang misan king tulid nang awang
ating migparadang kule maputing van,
detang pakasake kinuldas lang dapal
uling me flat ya ing gulung dane wanan.
“Me flat ya ata brod”? nganang migsalita
ning murit saka ya timan-timan bagya,
“balu muna pala” pekibat ding adwa
“mangungutang ka pa, atin kang agawa?”
Tinggal de ing gulung ketang dane arap
at gulping inabit king ba’yang mabaklas,
dapot ding turnilyung king gabun da timpak
asagud do reti’t king kanal menakbag
Pablasang ing takap ning mesabing kanal
ala yang keliwan king parilyang kalang,
iniya ding turnilyu a karelang tinggal
a karin mebalag e ro agauk man.
Ala lang aisip ding adwang lalaki
para mikabit ya reserba da reti,
at uling Duminggu saradu lang pilmi
magtindang turnilyung pisalwan kareti.
Migluklukan la pa banayad minisip
nung makananu reng ing gulung akabit,
kalyan-kalyan nala ning mesabing murit
a malambat na ring karela magmasid.
“Maina ko klasi” nganang migsalita
nitang sira buntuk a manulu wawa,
“nung lukluk kayu ken ala kong agawa”
ngana pa karelang anti mong manuya
“Ing pekamasanting a dapat gawan yu
karing atlung gulung, kuma kong’ turnilyu;
at karing dugang a karen pikuanan yu
agyang tunggalan mu mikabit neng pihu
Ing kekong reserbang dapat yung isalpak
a ipamalit yu king gulung yung mispak;
kasimpling problema megulu ko utak”
ngana, at saka ya matning sinagakgak.
Mipaglalawe la ring adwang lalaki
at mipamulala king kayang sinabi,
ngana nitang driver king abe na niti
“gyang palang murit ya mayap ya diskarti”
Matulid a sabi ikwa ng mikabit
agpang king upinyun nitang sira isip,
inia ing gewa ra keya la linapit
mekipag-istoryang mapilan penandit
“Pagtakan ku abe” ngana nitang metung
“nung bakit miras ka keti at mikulung”
“bina keng mengasdan king kekang suhestiyun”
a talaga namang yang tune solusyun.
Mekibat ya iti kareti nang adwa
“balu yo” ngana pang karen migsalita:
“murit ku man at ing isip ku malabsa,
e yu ku kalupang misdan at mulala”!!!
Vhelle V. Garcia
June 14, 2012
Abu Dhabi, United Arab Emirates
