MISAN, akabungil ke’ing siping kung bale
king e naman binang maragul a bage,
Pero uling bala’mu makaloko ne
Mipasawa na ku’t sebianan manene.
Oneng imbes ya ing maniawad dispensa
aku pa rugu ing biglang deragan na;
“Nanung apakit mung ebidensya” ngana,
“king ining linutu kung bibi keka ya?”
E mu pilan besis dinakap nia kabud
karening bibi ku pilatan ming bakud,
Indat atiempun nang maniaman ku tudtud
at akung king bale ku melakuan kabud.
At ngeni pamu pin uling katmu na ku
king balamu kusa nang pamanabusu,
Marapal keng kinua luyung nang apu ku
ban suguran sana dapot memandal ku.
Uling keng isip ku, king penandit a ita
sinulud bigla ing kasebyan, a ngara:
“Milang ka pang maka-tapulu bayu ka,
gawa king bage a pagsisian mu pota”.
At nanung masanting a kanakung akua,
mikalabkab ku man keng sobra kung kamua?
Angga mu king aku o ya ing miragsa
nung mikaras kami’t katuluanan daya!
(Akung apate na o yang apate ku
aku ing masukul, ya king kampu santu;
Akung madisgrasya, makulung yang pihu,
karing kapamilya, kaplas lub parehu).
Depat ku, menintun kung lapis at papil
ing anggang palmura sinulat ku karin;
Kaibat, ing gewa ku silaban kia murin
ban mabe king asuk, ipaid ning angin!
(Wayta, menawa ku pusu’t pilubluban
king aku nang kusang melubak a talan
King luyung a ume kung keya ipakal
ketang oras na ita king ba’yang mabandal.
At saka nanu pa mong akarapat ku
ngening ining taung kunsumisyun kaku,
keya ala kung agunut agiang nanu
antining ala yang keliwan keng kalbu?
Angga mu king pane keng mibubungil n’yan
nung e ing remedyu kaku manibatan;
Inia ing gewa ku kimbira ke misan
minum, at adobung bibi ing pulutan.
Umpisa kanita, e na niti gewa
ing sadia a kaku gagawan nang kusa;
Inia ngeni asna ne king kaganaka
at ing respetu na kaku mitas bigla!)
