(Kaugne ning pang-Dinalan at Labing Aduang banua
(112 th) nang Aldo Kebaitan DIOSDADO P. MACAPAGAL,
ngening Setyembre 28, 2022 – iting kawatasan a maka-
parikil king matapat, malinis at marangal nang bie ning
mapuring anak ning Pampanga ya pamung yampang mi
para king malugud yung pamamasa).
Bulan ning Setyembre,
Caduang pulu’t walung aldo king bilang na
Banua ning Mengabus,
Libu siam a ralan, apulu ing petsa;
Keni San Nicolas
Ning balayan Lubao iti mibait ya
Lalam nang bubungan
Ning metung a dampang meging carinan da
Ding pamilyang PANGAN
Ampon MACAPAGAL king panaun a ita,
Ing cagalang-galang
At meging mapuring Anac ning Pampanga.
Ibat king malati
King bie cacaluluan ya iti miyanad,
Dela nang meragul
Itang cababan lub, ganaca at sipag;
Ing cacaluluan da
E meging sumbagal king cayang paninap
Uli ning matibe
Capagnasan niting king bie na milangcap;
Ing bengi gewa neng
Aldo, at ing oras nang paynawa dapat,
Pegobra na banting
King para gastus na makasaup ditak.
Nu’ anti caragul
Ing meging papil na king labuad tang’ tibuan
Ning melapupuri
At idolu tamu itang Capampangan?
Balen, e mu bucud
Dai re ring Watas king Amanung Sisuan,
Meging matibe neng
Pundasyun mu naman niting lalawigan;
At ketang panaun
A metung ya karing kekatang Congressman,
Penicuanan niti
Ing asuywan na ca king keyang cagiwan.
;
E mu pilan ucdung
Menungculan ya’yti carin king Congresu,
At metung ya naman
Caring dacal diling asaupan a tau;
Dapot misan mu man
E na gewang punan iti king gubyernu
Banting micualta ya
O magcamal banding ibat king e ustu;
King mipmung tetagan
Ampon calinisan ning keyang prinsipyu,
Pepakit na niti
At gimpanan mayap ing pamagserbisyu.
At agiang canitang
Ya nang matas diling opisyal ning bansa,
King tungculan niti,
Ala yang depat a pamagsamantala;
Catapatan murin
Ampon tetagan lub itang migdatila
Busal ning pusu nang
Alang nanu pa mang keca pamagcunwa;
Capilan man Balen
Caring para keca e ya migpasasa
Nune lalu ya pang
Mgsicap canita king ba’cang minawa.
(Atin ya pang casuglung)
