ING MAYAP a talasuyu
at banal a pararasan ketang kayang sasakupan
karing balang desisyun na,
maingat yang bina iti alang tutulak-kabiran
e paysaul karing tuksung
king aldo-aldo akakit nang andu-andu king arapan
ali na la paglibe ding
prinsipyu na at dangalan king kislap na ning pibandian.
Nya e kabud bisu-bisu
at parating mamirapal, misip pamung libung besis
nung tanggap ka king babie ra
o payali king e ustu, e ka mu sa maglaparis
tapat at pante serbisyu
karetang kapagobra mu, pagkalub mung alang mintis
uling iti pupulan mu
at pakinabangan lubus, anggang mipante na bitis.
Ustung lagyu’ing mimusingan
king bie ning metung a tau, agyang nanan meng linisan
e midayu ing bau nang
anting malanam a asan, nanan me mang pakawasan,
karing mata ampon pusu
at banal a pilubluban taung inagrabyaduan
itang late na magmarka
king kekaban na ning bie mu, anti yang biuk king katawan.
Uling agiang numanu ka,
angga na king kamatayan, iti e mu asalicut
atyung pane king isip mu,
e na matda kapilan man at karin ya durut durut
ala yang kealiwan king
kamaru keng dayatan at yamut na ning liling dikut
kabang atyu ya king gabun,
kilub ning mapilan aldo, e magsilbing e ya sirut.
Ing sukilkil ning kunsensiya,
kenu mang taung mabibie, kapilan man e mabating
alino keya takidkid,
at parating makatanud kabang bie na mamasaring
king isip ding matutuksu,
kakalawat king e ustu at darapat e masanting
kabud ila’ing metaklayud,
alang mintis mitake la karing gawang e magaling.
Pakibalak yo ring tau
a mayap a pilubluban at tune karapatdapat
king nanu pa mang larangan,
makasadiang magmasabal, pakipamuk ing masampat
king matibe sumpa reti
a ing sana king tungkulan manatili la sa’ng tapat
magbasi la king kagiwan,
gawa, pamirapatdapat at e king tinggap ding gamat.
Ing tune’t mayap a lider
nung balu na ing matulid sukat yamung ipaglualu
uling karetang dinalan,
a talapamuntuk ken metung ya o adua la mu
ding e paysilo king kinang
at masiring amuyut ning ngara tilbug mu king gintu;
king duduang dang makabalut,
o keng sobri makalulan, panakap king ustu’t tutu!
Catherine L. Montemayor
a.k.a. Babaing Matun
ning Mexico, Pampanga
