Kasebyan karas keng katuswan ngara pin
Alang sumambut keng lamiran a matsin;
At uling mayap lang magsasalambitin,
Maging keng kalokwan tiktak la kagaling.
Nung mekakit na kang matsin a magsirku,
Ala’ng keliwan yan king ikit kung tsonggu;
Pero mekad ining keko’ ikwentu ku,
Ya’nang pekamayap karing sablang tusu.
Misan, iting matsin ikwa nang mesuksuk
Keng pamanukyat na keng kuayan a gabuk;
At uling king danggut iki ya mesuksuk,
Indat atsitan ne, ali ya milukluk.
Aisip na niti ing munta king plasa
At itang barberu ya ing lepitan na;
“Abe, kabud ikwa meng abagut” ngana
“Mamayad ku agyang kasing magkanu pa”.
Kapamilatan ning labahang matalas,
Inatsit neng dapal ning barberung paspas;
Dapot uling mekad kakambal yang malas,
Aputut ne iki king e na pamingat.
King kamwa ning matsin, ta’na kagad-agad
Adwang bage keta ing keyang inawad;
“Nung e me asuglung ikit kung mepatad,
Ing kekang labaha yang ibie mung bayad”.
Uli ning talagang e na ne asubli
Ning barberung gagad ing mesabing iki,
Bistama’t ing tutu e na naman buri,
Binye ne’ing labaha’t e ne mekatanggi.
Kabang maglakad yang pa-uli ing tsonggu,
Apaindalanan ne ing mangutud trosu;
“Matwa gamitan me ining labaha ku,
King ba’mung akalis agad ing dutung mu”.
Keng kaligaga na ning mesabing matwa
Ta’na ne pengalis trosu ing labaha,
Dapot e ne pa man apamutut sanga
Mebungal ne taram at mepirasu ya.
Mipagulisak yang bigla iting matsin
King pangasira ning labaha ning muting;
“Matwa” ngana niti, “ngening-ngeni murin
Alilan meng bayu a pekamasanting!
O nung ali kaya, iti namung dutung,
Yang ipamayad mu ba’kung e mandalum”;
Ini rugung matwa a e na miyurung,
Minuli nya muping batbat ning pagmalun.
Pisanan ning matsin ing anggang panangab
A keta nipnap nang keya mipamayad;
Kaybat, ing disan na king keyang panlakad,
Magbibingka neman ing ‘naluk nang agad.
“Apo, apo” ngana, “wayni gamitan mu
Ining anggang dutung a pupusanan ku”;
Natural mu rugung mabisa ya’ing tau
Uli ning kusa nang babye niting tsonggu.
Iting magbibingka king sobrang tula na,
Ing pasalamat na alananti keta;
Mupin, inyang ta’na magisan tengab na,
Iting tusung matsin, mig-iskandalu ya.
“Matwa, gisan mu ngang tengab ing dutung ku,
King uli namu ning pamag-bibingka mu;
Bisa ka’t e bisa, ibayad mo kaku,
Ding anggang bibingkang ngeni alutu mu”!
Ing kalulung matwa a’yalang pamalit
King dutung ning matsin a keyang ginamit,
Mabayat man rugu ing meging kapalit
Piak-mata na namung inakmul ing pait.
Binitbit nong agad ning salbahing matsin
Ding anggang bibingkang asaklit na karin;
Dapot king panlakad niti e na pansin,
Mekasanggana yang asung asna tuling.
Dikma ne ning asu at ta’ne pemisig
Iting lokung matsin a e mipulandit;
At kaybat uli ning e man mikulait,
Mete nyang makanyan a’yalang linapit.
At ding bibingka nang misalbag king dalan,
Ning meyalang kalmang matsin a sugapan,
Wayta… itang asu a keya sinagpang
Ya kabud linaklak, mibural a atyan!
