O’ Naturalesa,
nu mu ta sinimpan ing pali, ing lambing
na ning Primaverang
sepulyut mu tula, begutan mu ningning…?
Oyan, lawan mu la
dutung mung ticusan a migcule Uling
king pangalubas da
pepabustan mu lang king dimla mebingbing…!
aliwa mu ila,
O’bat pati acu at ding cacung supling
pamakarugan na
ning dimlang tagle mu a makapangingking….?
Biclat ke ing pasbul—
Nanung selubung mu, O’ Naturalesa…?
Ing maplas nang sapul
ning angin mung bibyung a misna carimla…!
At itang dapulpul
ning maputing yelung dagpa kening lupa
miniagid king butul,
tataglus king kakung pusu at caladua;
O, e cu atarul…
bakit ing dimla mu kaku mu papagpa
Magbabo king ukul
king ing kekang pusu…yelu ya king dimla.
O Naturalesa,
o’bat e mu buri king dinan keng pali
ing bale dirimla,
a magkulangan na king tangab ning api…?
Nandin lawan cu ya,
memala ne alus ing laman ning tanki
magundap undap ya
ing cayang pabelung king laru melangi,
nya dapat cung tipa
manintun kung larung king tanki ibili
ali ku abatang
kingking la king dimla ding kanakung sapni.
Biclat cu ne naman
ing pasbul ning bale…mimwa ka’t e mimwa
kaku yang sungaban
ing tagle mung dimlang kaku mu paniagca;
tikis keng dulapan
ing larung kailangan king tangki ikana
bayu ya lubusan
mapda ing pabelung undap-undap sala,
nung king gawan kung yan
pikasaman mu ku, tanggapan ku na pa.
ing e ku tanggapan
akit kong anak kung king dimla miragsa….!
Nota: Karing manigaral poesiang kapampangan, ing Poesia piguratibu ya. Ing kabaldugan na ning Magyelung Dimla ya na kabud ing kapanamdaman da ring kalupang kapampangan a mikarimla na lugud king amanung sisuan. Ing mikakarimlang bale ya na kabud ing bale na ning Parnasong Kapampangan, http://parnasu.ning.com, a magkulangan a tangab pauli ra ding dimut ing laru o kawatasan da ding talasulat a kakana ra king tanki ban munye pali king kabilugan a bale. Ing naturalesa yana kabud ing kaugalyan a sasagka king panyulung na ning amanung sisuan, antimo ing eskwela, kalakal, pamahalan, media, pengari, at aliwa pa. Ing Poeta keni ila ding makimasabal king amanung sisuan a alang gulat lumwal king pamanintun da king laru ning kawatasan a munye pali king mabibingbing a Parnaso. Sana mikarakal la pa ding poetang e tatakut king dimla na ning naturalesa at lage lang manintun king larung babye pali king bale na ning amanung sisuan.
nu mu ta sinimpan ing pali, ing lambing
na ning Primaverang
sepulyut mu tula, begutan mu ningning…?
Oyan, lawan mu la
dutung mung ticusan a migcule Uling
king pangalubas da
pepabustan mu lang king dimla mebingbing…!
aliwa mu ila,
O’bat pati acu at ding cacung supling
pamakarugan na
ning dimlang tagle mu a makapangingking….?
Biclat ke ing pasbul—
Nanung selubung mu, O’ Naturalesa…?
Ing maplas nang sapul
ning angin mung bibyung a misna carimla…!
At itang dapulpul
ning maputing yelung dagpa kening lupa
miniagid king butul,
tataglus king kakung pusu at caladua;
O, e cu atarul…
bakit ing dimla mu kaku mu papagpa
Magbabo king ukul
king ing kekang pusu…yelu ya king dimla.
O Naturalesa,
o’bat e mu buri king dinan keng pali
ing bale dirimla,
a magkulangan na king tangab ning api…?
Nandin lawan cu ya,
memala ne alus ing laman ning tanki
magundap undap ya
ing cayang pabelung king laru melangi,
nya dapat cung tipa
manintun kung larung king tanki ibili
ali ku abatang
kingking la king dimla ding kanakung sapni.
Biclat cu ne naman
ing pasbul ning bale…mimwa ka’t e mimwa
kaku yang sungaban
ing tagle mung dimlang kaku mu paniagca;
tikis keng dulapan
ing larung kailangan king tangki ikana
bayu ya lubusan
mapda ing pabelung undap-undap sala,
nung king gawan kung yan
pikasaman mu ku, tanggapan ku na pa.
ing e ku tanggapan
akit kong anak kung king dimla miragsa….!
Nota: Karing manigaral poesiang kapampangan, ing Poesia piguratibu ya. Ing kabaldugan na ning Magyelung Dimla ya na kabud ing kapanamdaman da ring kalupang kapampangan a mikarimla na lugud king amanung sisuan. Ing mikakarimlang bale ya na kabud ing bale na ning Parnasong Kapampangan, http://parnasu.ning.com, a magkulangan a tangab pauli ra ding dimut ing laru o kawatasan da ding talasulat a kakana ra king tanki ban munye pali king kabilugan a bale. Ing naturalesa yana kabud ing kaugalyan a sasagka king panyulung na ning amanung sisuan, antimo ing eskwela, kalakal, pamahalan, media, pengari, at aliwa pa. Ing Poeta keni ila ding makimasabal king amanung sisuan a alang gulat lumwal king pamanintun da king laru ning kawatasan a munye pali king mabibingbing a Parnaso. Sana mikarakal la pa ding poetang e tatakut king dimla na ning naturalesa at lage lang manintun king larung babye pali king bale na ning amanung sisuan.
