KITNAN da ku obat e ku kanu yata
Intrisadu ngarang pasaksak bakuna.
“Emu ayalben keng TV ing balita:
Parakap nong’ Digong ding e pabakuna?”
Mekibat na ku mang pabiru, at ngaku
“Atin waring batas makulung ya’ing tau
A e pabakuna? Rugu keng idad ku
A migit otsenta – keya pa mi-usu,
Ing anti kaniting klasing kautusan,
A ipakulung ne ken ing ninu ya man,
King ba’yang mapilit magpabakuna yan?
Asisiguru kung dakal lang salangsang!
E ta’la asisi nung bakit bantulut
La ring aliwa ban mamintu king utus;
Uling mangibabo karela ing takut,
Pasari namu ning dakal a indredus.
At nu manwala ku keng babalita ra
A nung e ya kanu mebakuna ngara
Ing misis ning akayabe ku keng obra
E mete, migpabakuna na ku sana.
At agyang keng sosyal media, ing balita
Inggil king bage yan, kalat na menasa;
Syentipiko’t doctors la ring magsalita,
King ating peligru ing magpabakuna.
E la limang doktor ding apanalben ku
A sinabing kabud pepatusuk tamu
King e ku na sabyan ing tatak na nanu,
E ta’na dasan mang adwang banwa kanu.
Inysa’t pati na king kakung sarili
E kua’pakibatan ing bage-bage’yti,
Antining e ku pa mu naman asabi
Nung yan paniwalan ku rugu o ali.
Nu’ne ing kanakung matibe sandalan,
Kasalpantayan king Dios a Miglalang;
Ya mu kabud busal ning salut a dintang
Ing king Tau munye ganap kaligtasan.
At ining inggil keng sinabi nang Digong,
Ding e pabakuna, dakpan la’t ikulong,
Nu’la mipagyu reng e mu pilan milyon
A iparakap na at saka isukol?
E king susugiran ta’ya i Duterte,
Yan, e na agawa – pamatakut na’yti;
Alang batas ken a agamit na niti
Ban ipakulong ing taung inosenti.
Bulalag king i Digs abugadu ya pu
O Attorney, obat simpling bage rugu
Pepaykamali ya, e na wari balu
King alang Ley inggil king keyang kenabu?
Ini namang Roque asne kayalistwan
Dipensa, at ngana: “figure of speech lang
Ni Pangulo ang salitang binitiwan,
Na ikulong ang di magpabakuna riyan”.
Makakit ka agyang kataya mung Sabi
A ‘figure of speech’ king bignus nang Roque?
Ala kapurit man, inya asasabi
Tamung ya, panakpan niamu i Duterte!
Makwentu yamu ing Presidente tamu
At mapamiru ya agyang keng publiku,
Inya ita’namu agpang king balu ku,
Ing nung makananu tamung maki-usu?
