1.
Misan a panaun
king metung a baryu a binang maliblib
katakup ning silim
karetang memaryu ala nakang akit
magkulung no bale
e na la titipa nung inia tahimik
biung na na ning angin
ing kekang damdaman at kiyak ding kuliglig
2.
pablasang kanita
king mesabing lugal ala pang kuryenti
inia mibalitang
dakal a manakit tikbalang at kapri
lakuas pang mesiri
ing takut ding tau karas na ning bengi
pasari na nitang
maglakung balut a karin mipalili
3.
Ing magtindang balut
pagmumulalan de nung nu ya manibat
kabud ne mu lalsut
busal ning talaibl king dalan a gasgas
ing datukanan na
karing titinda nang kayang gugulisak
maragul yang basket
a bibitbitan na king wanan nang gamat
4.
Itang kayang suala
ngana ning metung a kaya mekaramdam
makapangilabut
anti mong manibat kilub ning tapayan
ing metung pang bage
a ayalak ku king MAGBABALUT a yan
daratang ya keti
ustung masala at mabilug ya’ing bulan
5.
At neng lalakad ya
gagalayud no pa ring kayang sapatus
e me akit lupa
uling malapad ya ing kupya nang ebus
inia karing tau
alang mengangas at mig masikan a lub
kulaitan de mu man
ban sali karetang titinda nang balut
6.
Maging ding manasan
at susulung tugak king takut da reti
e no bisang dulung
ban lang manintunan karas na ning bengi
pelalung magtinda
king mesabing baryu ampon negosyanti
ena manakitan;
at sasaingsing na ketang pangalugi
7.
At uling linto ing
dakal a problema pasari ning takut
misasanmetung la
ding anggang memaryu’t agad dang kinimut
ngana ning kapitan
“itamung lalaki e tamu matudtud
PAKIBALUAN TAMU
ing misteryu dikil king magtindang balut”
8.
Iniang dalumdum na
ding anggang lalaki mitipun-tipun la
magdala lang sibat
salapang at lait a peka armas da
at ban sikan la lub
king karelang nasa apikayari ra
tumage la pamu
ban e la mainip king pamanenaya
9.
Saktung alas dosi
pablasang taimik na katni rang dimdam
Itang kulait na
nitang magbabalut king gasgas a dalan
iniang katulid na
karing manenaya king kayang paniatang
Inaus ne nitang
metung a lalaking magtapang-tapangan
10
“SALI KO PUNG BALOT?
ngana ning magtindang karela linapit
“WA” ngara at itang
takap na ning basket gulpi reng linislis
MIPAGULISAK LA!
uling e la BALUT ding karelang IKIT
nun e PENOY la ngan
pablasang atin lang markang ADWANG GULIS…
