Munag-munag pamu mibablas ne’y Minyang
Uli ning i Tonyo maranun yang datang,
King panuli niting Saudi manibatan,
Kaybat na ning limang banwa neng panayan;
At uling king NAIA karin de saganan,
Bayung bengi pamu makasadya na ngan
Ing mialiwang bage karelang bakalan
Ban e la dumanup mayatrasu ya man.
Disan na ring migit king metung a oras
Bayu digpa NAIA, miglanding king tarmac
Itang eroplanung PAL a pekasikat,
A sekyan nang Tonyo menibatan Riyadh;
At uling i Minyang masyadu yang atat,
Kalwal na pang Tonyo king bakud a rehas,
Mig-ala Darna neng karin migpaparak,
Trumpeta ya wari king katni gulisak.
Agad ne kinaul, penaplit inuma
Ining asawa nang malwat mu ring ala,
Uli ning labis nang kasabikan ata
King e na panuli a makaba-kaba;
At uling i Tonyo balu neng masiba
Aisip nang Minyang, bayu la magkera,
Ing keyang asawa, ikundisyun ne pa
Keng ‘x-rated romance’ a kapad dang adwa.
Natural mu kasi kareng bayung datang
Itang malambis king asawang disan,
Lalu pa’t nung iti malwat na neng likwan
At midyeta ya’yti king keyang kandungan;
Pero ining Tonyo nanan ne mang kawlan
Angga mu king e ya ‘nabis minapis man;
Kababalaus nang metudtud manyaman,
Kaybat dang minapun at misulung mengan.
Inisip na namu rugu ning babai,
Ing mepagal yamu i Tonyo keng biahi,
Nung inya e ne man pin sipingan ngeni;
Magbawi na ngana kabukasan bengi.
Pero, ing metung pang apansinan niti,
Dakal a migbayu king datang nang iti;
Magdala ya man sang’ alak king lalaki,
Dapot e ya ‘mig-shot’ metung mu mang boti.
E na’batang Minyang… kabukasan abak,
Ing keyang sukal lub kang Tonyo na biklat;
Nung baket at nanu – kilub ning kabukas,
E ne lepitan man king karelang papag;
At metung pa nganang pagsintyan nang ganap,
Pemye na nabengi ing bitbit nang alak,
Samantalang iti sadya nemang gagad
Karas keng inuman a kaba-kabukas.
“Darling” nga’ning Tonyo, “ing sadya kung bisyu,
Malwat ku nang leko keng pamag-Saudi ku;
Uling karin pala… sadya ka mang loku,
Keng sobrang igpit da akwa mung magbayu”;
“Pero” nganang Minyang, “ing pagmulalan ku,
Atyu na ku ketang ing alak leko mu,
Uling bawal karin – pota kasukul mu;
Pati naman wari pamanyigarilyu”?
Ing anggang mung alak pemye mu ngan
At king Marlb mu ala ka tinagan;
Asabi mu waring king kekang panyatang
Ing e na ka minum kabang bisyu mu yan?
Saka’ing sigarilyu, king Saudi e bawal,
Pati wari yan ‘dear’ tiknang mu naman?”
“Wa darling, ing anggang bisyu leko ku ngan
At migbayu na ku king sadya kung asal”.
“Oy’ning darala mung a mialiwang lamak,
Kenu ta’ ipamye karing kamaganak?
Alangan naman ing kaku ngan ing ‘make-up’
A makalulan king kekang ‘travelling bag’”?
“Ay, e ta’ pamye yan agya pang katambak,
Ala kang dirinan pelalung kapatad;
E wari sabi ku… mibayu kung ganap?
Kekatang adwa yan, ilele mu Sweetheart”!
