Y Pedro metung yang taung atmung sipag,
Kaibat na king obra sulu ya pang tugak;
At ya maranun yang mibabangun agad
Ban king damulag na ya pa ing gumatas;
At keta ya namang king dalan maglakad
King ba’nang irasyun king plasa neng abak.
King keyang sipagan dakal lang dalaga
Ding nanan da namu ilang pagloluan na;
Mupin iting Pedro uli ning duñgu ya,
Kulang namu rugu ing yang idakma ra;
Iti, angga mu king maglolo yang mata
King pagnasan niting buring ayasawa.
Ating mebalu a keya makiburi,
Sabian pa, iti man asne king kasiri;
At waman atin yang anak a malati,
Uli ning itinan sinta na neng dati
Ya na kabud keta ing keyang apili
Ban maging esposa at ikasal Pari.
Inumpisan na neng piglolon at siywan,
Sinaklu yang danum, mengutud yang kuayan;
Mupin ing problema a keyang isipan
Buri ning babai engrandeng kasalan;
At pawang pili pa ding maging tegawan
A inawad niti banting maging sosyal.
Natural mu ngening e bibirung gastus
Iting makarikil a keyang ibekut,
Ing kalulung Pedro ganap nang atalus
E makagiu pera nung e ya kumayud;
Ala namang keya maliaring sumaup
Pablasang ing tutu ulila neng lubus.
Kanita ne rugu lalung miamas-amas
Kinayud ping alus beinti kuatru oras;
Bukud king aliwang obra na neng abak,
Migtinda yang asan, gule ampon prutas;
At saka meki-upang menasik keng dayat
King saup ning keyang metung a damulag.
At ing aisip nang diskarti pang metung,
Kailangan king gatas… ing tubu na dagul;
Ngana: “Siguru nung samutan kung danum,
Mapilan mung aldo dakal na ku tipun;
Ing metung a litru, king metung a galun
Manawa keng’ tubuan keng misan a rasyun.
Malagua’t salita ya’nang depatan na,
Digdagan nang danum ing gatas nang tinda;
Oneng e melambat… iti, mebistu ya
Pauli ning alus mistulang danum na;
Angga na king iting malino suspetsa
Miras king Kapitan ketang oras a ita.
“Pedro”, nganing kutang ning budning Kapitan,
“nanung asabi mu king reklamu rang yan?
Katutuan king iti a keka ra bintang,
Ing tinda mung gatas kekang daranuman?
Makibat ka kaku’t maniabing tapatan,
King ba’kung abalu ing dapat kung gawan”.
Mepipi ya’t alang balung imatulid
King mesabing kutang a binang masakit,
Nung inia marahil bigla nang aisip
Ing gawan paralan ban e ya masipit;
Uling nung king tutu karin ya mirikdik
Lunto king ala yang matulid unabis.
“Kapitan, e tutu ing keka ra simbung,
King ing kakung gewa dapat dang idalum;
Aku pu ala kung matsurang intensyun,
At e ko’ milangan king yatad kung rasyun;
Labag naman wari sir keng konstitusyon
Samutan gatas ing masasaling danum?”
Nung sana king bili ing tinda ku gatas
A’ynabayan danum o nanu mang sangkap?
Kanita marahil atin la pung basas,
Sumabing atin kung intensyun manekas;
Oneng danum mu ping dininan kung gatas,
Nung inia ing sumbung e ku pu atanggap”.
Absueltu ya’y Pedro king meging kasu na
Uling apalto nang maki-matulid ya;
Ing sumbung: Ing gatas na kanung titinda
Makisamut danum amatuliran na;
Oneng e pin gatas a daranuman na,
Nune danum mu ping gatas ing yabe na!
