Ing linala kung poesia e ne bunga ning diwa ku,
Iti dimdam kia mung kwentu a ‘joke’ da reng komikeru;
Pigpuyatan keng rinima ba’na ko mang magkusuelu,
Panulu ya kaniang lungkut, maili ko pung siguradu;
Tungkul ya’yti kareng sese – e ya pusa, e ya asu,
Nune metung yang malabit… biasang magsalitang Loru!
Keta king metung nang balen ning probinsyang Capampangan,
Ating bayung Biyudu karin, iti atin yang tindahan;
Anti ya waring ‘grocery’ uling alus atyu na ngan,
Miayaliwa ing paninda… malyari ka pang manutang;
Deng suki nang mamaniali: Ing mumuna rang katulan,
Itang makataling Loru – magsalitang alang tuknang!
Ining Lorung maindredus turu ya’t binang maisip,
Kabiasnan na pang mamuska, ngana keka “pangit-pangit”;
Yang yutus nang mamisali neng matundung bisang midlip,
Alang mangangas makialam; manyukit o mamaglimid
Uling sumyo yang pitada iting Lorung sobra labit!
Iniang misan iting Biyudu ‘tin yang maulagang lakad,
E ne sera ing tindahan uling magbalik yang agad;
Menabilin nia king Loru, ngana: Nung ating manatad,
Kuma kang Beer: apat a “case”, “one box” Emperador lapad,
‘Tsaka limang sakung abias; At bukas namu ing bayad,
Magtiwala no’man keka, king discount e naka maniad.
Keta malagua’t salita, din’tang yang “truck” na ning abias,
Kitnan de ing Lorung turu – pilan ing karelang kuldas?
“Mikuldas kong’ beinting saku, kamada yung miamas-amas
Ban e ya mimua ing Boss ku… keko ali ya mikamas!
At pasabi ning Amu ku – balikan yu niamu bukas,
‘The customer is always right’ e na ke man balasubas”
E na man masyadung migluat, dinatang lang misalisi
Ing mag-deliver kaniang Beer ampon Emperador Brandy;
Ngana: “30 cases of beer, ibaba yu ngening-ngeni,
‘10 boxes of Emperador’… isalasan yu na keni;
Bukas na kayu manyingil, kaku penabilin niti,
E ne man tekas ing Boss ku mabayad kong’ pilming-pilmi”.
Iniang datang ya ing Bossing ikit nang makatalaksan
Ing Beer, Emperador ampon abias aduang pulung kaban,
“Ot karakal mu inorder?” ngana king Loru mengutang,
“Bossing bibiruan ku lamu, oneng karelang tituanan!”
Ketang kamua na ning Amu, pemasla ne’t sekal batal,
“Boss mate ku, bili yu ku, e ku rugu kasalanan!”
“Talagang paten da na ka” nganing mikakasbung biyudu,
Maigpit neng sasakmalan – dela babo na ning kuartu;
Layun kinanwang pakung dos at dimput ne ing martilyu,
Makayagpa nong’ pinaku aduang pakpak na ning Loru;
Maglapasag lang bitis na, “Aruy, masakit mate ku!”
Pati bitis pinaku na… antimo kang Jesukristu!
Keng pamanangis ning Loru, tiempu atin yang amatan
Ketang katulid ning panig a kaya ra pipamakuan,
Ing Cristong makabayube ketang krus Nang kematayan
Ya ing ikit na ning Loru antimong makidamayan;
Melumpawi itang kirut at kaplas nang daramdaman
Uling ‘tin yang akarame… ketang keyang kasakitan!
Agad na namang miniral itang keyang kadaldalan,
Itang makapaku king krus insegidu na neng kitnan;
Ngana: “Hoy, hoy tao, bakit? Na’ng gewa mung kasalanan
Ala na ka rugung atyan, obat e no’ melunus man?!
Ah, amigo balu ku na! Metung kata kamulangan,
Minorder ka namang Beer, neh? Ali ka sana maglaram!
Ining kanakung pikatsa keni ku ne pupututan,
Bisa na ku namang morder ban ipaku ra ku naman!
Francisco M. Guinto
Barangay Sta. Maria
Macabebe, Pampanga
