1
Ating metung a istoryang e ku pa lubus kelingwan
dikil ya karetang atlung taung mikakaluguran
ing mumuna bisaya ya a awsan dang waray-waray
Ilukanu ya ing kadwa katlu ya ing kapampangan
2.
King karelang pamiyabeng malambat na ring panaun
e bitasang kinupas ing lugud da king balang metung
king aldo’ldo akit mu la abe-abe lang luluyun
mikakawani la reti karas na ning gatpanapun
3.
Pagtakan da ring manakit o’ba’t mikakasundu la
samantalang myaliwa la panugali at kultura
Ilukanu kabalitan kuriput la kanu ngara
ding bisaya naman kanu pilipit la ring dila ra
4.
ita namang kapampangan sasabyan da ring keraklan
kabalitan tamu karas karing lutung manganyaman
at maging king pamamorma o king pamagdalang malan
Itamu ing manimuna e maraig kenu pa man
5.
Ketang misan menagkat yang munta ilug ing bisaya
“silo tamung bunwan” ngana “sakenan ‘ta ya ing bangka”
“nung makanian” ngana namang lakay a migmunikalâ
“magamusal tamu pamu bayu tamu gayak kaya”?
6.
“karin ‘ta na mag amusal” ngana nitang kapampangan
“ban e tamu madis-oras king pagsarian tamung lugal
tinape na at sardinas ing kekatamung bakalan
“manutang ta na pa” ngana “ketang tindahan nang toyang”
7.
Kayari rang mengan deti mengutang ya’ing ilukanu
“ninu ngana ing mamayad kaniting autang tamu?”
aku namu ngana nitang kapampangan mengamanu
“pitna-pita” nganang waray king ban alang garabyadu
8.
Anti ‘ni na’ing gawan tamu” nganang lakay a linatlat
“mandilu tamu king ilug singkalambat tamung sungab,
nung ninu ing munang lunto kekatamu yang mamayad
king inutang tamu nandin a tinape at sardinas
9.
Agnan-agnan sinungab la ketang ilug a malino
ing bisaya’t kapampangan halus agnan la mung linto
at uli ning meinip la sinaka nong menik babo
karin na la manenaya king abe rang magpagato
10.
Dapot kapitna nang oras epa lalto ining lakay
inia pin meliswas na la ring adwa nang kaluguran
linundag la ketang ilug segaran de kalalaman
mengapakyak nala rugu king karelang atangalan
11
Uling iti ala neng bie ketang lalam pakasakab
pakakaul lang matigik king batu ring kayang gamat
biryan na pa rugu nitang ilukanu ing mamangkad
kesa ketang bayaran na ing tinape at sardinas
