I Beklang milalu ya kakuriputan
Aldo-aldo ebun ing parati rang ulam;
Inia ngarang anting migreklamu misan,
Ding abe na bale “Ot pane makanyan?”
Ninu mo pin naman ken ing e sumawa
Nung pane nang ebun ing ulam da yata?
Inia mepilit yang inutus ne’ y Tekla
Ban ing ulam deti medyu manaliwa.
“Munta ka king plasa, king palengki taglus
Ing salwan mu” ngana, “aduang gayndung manuk;
Papaya, laya at saka murang langguk
Malungge ampo pang aduang kilong baguk”
Asne kaganadung minta king palengki
Ining Tekla uling isipan na niti
Ing pihung tinola pin ing ulam deti
Ngening paugtuan o kaya potang bengi.
Nung nu’ anti bilis meko ining Tekla,
Ing pamagbalik na makanian kalagua;
“Mam,” ngana, “insanu pu karening adua
Ing munang katatan at kuananan daya?”
“Ay, ali ta’la pa mu rugu papaten,
Papangebunan ko pamu reng aduang den,
Sayang la, malapit na ing fiestang balen,
Kanita ta’na la agnan ilutu ren!”
Ini rugung Tekla mengamus niang buntuk
At maybug malagas a buak pasapulyut
Ginut ing sarili king dimdam nang utus,
A ing e na la pa pakatat ding manuk.
Mangabaldugan a ing ulaman deti
Ngening ugtung aldo, saka potang bengi
Ay rugo e mako yan keng aduang klasi:
Baguk, liga o keng nasi, binabo’yti?
Nung anti ya kanian katipid masyadu
Ing kakuang kasaup – batingan neng pihu
Ning ninu pa mang ken a maki-pañginu,
Nung aldoldo iti ing pane ulam yu!!!
Glossary:
Pane – parati, menasa, madalas
Salwan – saliwan, sali
Pakatat – papate, palutu
Paugtuan – abakan, (lunch in English)
Pasapulyut – pabatak, pakulyut
Kalagua – kabilis, ensigida
Ugtung aldo – (lunch time in English)
Mangabaldugan – (nangangahulugan (Tagalog)
Binabo keng nasi – isinapaw sa kanin (Tagalog)
Batingan – lakuan, talasan
Makipanginu – makipagobra bilang kasaup.
Ebun – Itlog (Tagalog); Ibon – bird (English)
Rugo – (a certain word in Capampangan
that has no exact translation in any language
but its meaning denotes immense humility the
speaker conveys to whom he address the same;
And, Capampangans are the only one who used it).
