(Bilang dake ning pamagmasusi king Aldo ning Amanung Sisuan, a lokal bersyon ning ‘Buwan ng Wika’ keti Kapampangan, dakayanan ta’lang espasyo kening kolum tamu ding aliwa pang Poeta at Talasulat banting milimbag ding karelang kawatasan para king malugud dang pamamasa ring kabalen tamu)
Ating metung a istoryang sadyang eku akalingwan
patungkul ya karing atlung taung mikakaluguran;
Ing mumuna Bisaya ya, a awsan dang Waray-Waray
kakadwa ya’ing Ilokano at ing katlu, Kapampangan
King karelang pamiabe, malambat na ring panaun
e kinupas bitasa ing lugud da king balang metung;
Aldo-aldo akit mu’ lang miabe pane patingapun
mikakawani la reti ustung ume ng dalumdum
Pagmulalan ding makakit bakit mikakasundu la,
samantalang ela tugma king tradisyun at kultura;
Ilokanu kabalitan matipid at kuriput la,
ding Bisaya naman kanu palipit la ding dila ra.
At itamung Kapampangan sasabyan da ring keraklan,
sikat tamu karas ketang mapaglutung manganyaman;
At maging king pamamorma o king pamagdalang malan,
Itamu ing manimuna e maraig kaninu man.
Ketang misan menagkat yang munta ilug ing Bisaya
silo tamung bunwan ngana saken taya itang bangka;
Nung makanian ngana nitang ilocanu karing adwa
mag-almusal ta’ saguli bayu tamu gayak kaya?
Karin ta na mag almusal ngana niting Kapampangan
ban e tamu madis-oras ketang ayan tamung lugal;
Tinape na at sardinas ing kekatang almusalan
manutang ta’ namu pota ketang tindahan ng Simang.
Kayari dang mengan deti mengutang ya’ing Ilokanu
ninu ngana ing mamayad kaniting autang tamu?
Aku namu ngana niting Kapampangan mengamanu
ali ngana ning Bisaya, dapat alang garabyadu.
Antini na’ing gawan tamu nganang Lakay sinalabat,
mandilu tamu king ilug palambatan tamung sungab;
Nung ninu ing munang lunto kekatamu yang mamayad
king inutang tamu nandin, tinape ampon sardinas.
Agnan-agnan sinungab la ketang ilug a malalam,
penandit mu linto ne ing Bisaya at Kapampangan;
At uli ning talunan la sinaka no’ ketang pampang
panenayan da niang lunto ing sinambut king pustahan.
Dapot kapitna nang oras epa lalto ining Lakay
ania pin meliswas nala ding adwa nang kaluguran;
Linundag la ketang ilug, segaran de kalalaman
mengapakyak nala rugu king karelang atangalan.
Uling iti ala neng bie ketang lalam makasakab,
makakaul lang matigik king batu ring keyang gamat;
Biryan na pa rugu nitang Ilukanu ing mamangkad
kesa ketang bayaran na ing tinape at sardinas!
Neng: Vhelle V. Garcia
August 16, 2011
Abu Dhabi, UAE
