Ing kotsi kung Ford a kababaywan sali
Misan, kabud nyamu migtalatalandi;
Nung e ku mu medyu mabagal pulayi
Digsu ke apingkil ing kakung katuki.
Kasi, nanan ke mang dalpakan a prenu
E ya bisang kumet, inya ing gewa ku
Dilpak ke clutch, saka ku biglang mengambyu,
Ban e ku misapung king mumuna kaku.
Tyempu namang kening kakung peradaan
‘Motor Shop’ ya inya agad keng lepitan
Ing makibandi at malagwa kung kitang
Nung atin yang mekanikung apagawan.
Mapnamu bistaman katambak la gawa,
King pakisabi ku agad yang mebisa;
Inya agyang medyu mebalam kung bagya
Dininan ke pang ‘Tip’ ing taung ginawa.
Pero wayni’ing siste, inyang saken ku ne
Ing kotsi ban taglus na king kakung pake,
“Sir,” ngana “kaybat keng masusing linawe,
Ing prenu e kia’rin ikwang asalese”
Pero banting medyu iwas keng disgrasya
Pekasikan ke pu katni ing busina,
Ban ding katuki yu makapangilag la,
Pati na ring daralakit keng kalsada!”
Glossary:
Migtalatalandi – migpalundad-lundag
Digsu – ditak namu, maybug
Apingkil – asagi, tiran
Misapung – mibangga, misabal
Masusi – maingat, pakakalale
Makapangilag – makaiwas
Misapung – mibangga
Mityempu – mipaintagun
Bista man – agya mang
Mapnamu – mayap namu pin
Katambak – dakal a gawa
Malagwa – mabilis
Mebalam – meluat, meyatrasu
Dininan – inabutanan
Taglus – malaus, daretsu
Pake – sarya, buring puntalan
Tip – para kusuelu
Daralakit – lilipat keng dalan
Katuki – mumuna, tutukyan
Kalsada – kaminu, dalan.
