KABANATA 1A
Kamalayang Kapampangan Balikdan tamu itang panaun a itamu mung Kapampangan ding makatuknang king karinan tang iti. Itamu mung Kapampampangan ding atyu keti.
Malambat pa ita bayu dakatamu luban ding Hapon o Japanese (1941). Malambat pa ita bayu dakatamu luban ding Amerikanu (1898). Malambat pa ita bayu dakatamu luban ding Kastila (1571).
Kanita, bayu dinatang itang banuang 1941, itamung Kapampangan ala ta pang kamalemale karing panagkas da ring kawal a Hapon a “Kura! Kura! Bakaero!” at king sakit ning tampaling da kabang malmura lang makanyan. Ala ta pang kamalemale king dapat dang tampalasan a iatsa re babo ing bingut at sapuan de ketang pataram a makakabit king karelang riple. Ala ta pang kamalayang Hapon a anti kanta. Ing kekatamu, kamalayan yang Kapampangan.
Kanita, bayu dinatang itang banuang 1898, itamung Kapampampangan ala ta pang kamalemale karing talaturung mibansagang “Thomasites” ampo ketang aklat a “Pepe and Pilar” nung nukarin makasulat ing anti kanini: “I am Pepe. I am a little boy. I am Pilar. I am a little girl. I am Nena. I am a little girl too.” Ala ta pang kamalemale tungkul kang Abraham Lincoln at king kayang Gettysburg Address nung nu no simbitlan detang amanung “the government of the people by the people and for the people.” Ala ta pang kamalayang Amerikanu. Ing kekatamu, kamalayan yang Kapampangan.
Kanita, bayu dinatang itang banuang 1571, itamung Kapampangan ala ta pang kamalemale kareng mistulang pialben a paniglon a mipamansagang “fi esta,” “procesion,” “misa” at aliua pang “ceremonias” kambe ring dalit a “Kyrie eleison” at “Dios te Salve.” E pa linub king keketamung kamalayan ing makipagkal at makipatayan karing kalupa tang taung makasaut karing aliuang karinan. Kakaluguran tala reta. Ala ta pang kamalayang Kastila a mailig manalangin kabang makipatayan at mailig makipatayan kabang manalangin. Ing kekatamu, kamalayan yang Kapampangan.
(Abatan ya ing kasuglung.)
