KABANATA 2a
Pilublubang Kapampangan Isundu ta ngeni ing kekatang pamibalikid. Babalikdan tamu ing kekatang amamalayan anyang e dakatamu pa giluan deng Kastila, deng Amerikanu at deng Hapon; inyang itamu mung Kapampangan ding makasaut keti king Kapampangan.
Nanu mo kaya ing amamalayan na ning balang metung a Kapampangan ketang panaun a ita? Amamalayan na ing keyang sarili. At amamalayan na naman ing atyu king lual ning keying sarili. Itang king lual, ya ing minuna nang apansingan, anyang bingut ya. Kaibat na nita, kabang daragul ya, ita mu namang king lub na.
King pilatan na ning lub at ning lual, ating metung a tabing. Ing tabing a ini ya pin ing balat: ibat king balat ning bumbunan angga king balat ding talampakan. Kayabe ya ken ing balat ning lupa na, ing balat ning arung na, ing balat ding balugbug na; ing balat na ning batal na, tundun na, pago na, gulut na; ing balat ding gamat na, ing balat ding bitis na, ing balat ning atian na, ing balat ning buldit na.
Mistula yang imalan a makasulud ing balat a ini. Mistula yang tabing a makasable king kayang katauan (hindi lang sa ng kanyang katawan, kundi sa ng kanyang katauhan o buong pagkatao (whole person).
Ing balat ya ing mamilatan karening aduang dake a reni: ing lub at ing lual.
(Abatan ya ing kasuglung)
