KABANATA 2d
Pilublubang Kapampangan Mibalik ta ketang kutang: Nanu ing amamalayan na ning metung a Kapampangan anyang itamu mung Kapampangan ding makatuknang king tuknangan tang iti?
Pisabi ta ne itang amamalayan na king “lual” ning kayang sarili.
Ibat king balat, palual. Ngeni naman, ibat king balat, palub. Pisabian taya ing “lub”, ing lub ning Kapampangan. Ibat king balat palub, dasnan me ing “aku.” Nanu ya ini? Ing “aku” ya ing kakilubkiluban na ning pangatau ning metung a tau. E me akakit, dapot amamalayan me. Ing “aku” ya ing kalalam-lalaman na ning pangatau ning metung a tau. E me akakit, dapot amamalayan me. Ing “aku” ya ing libutad na — libutad a libutad na— ning pangatau ning metung a tau. E me akakit, dapot amamalayan me. Andat magsalita ya ing metung a tau, ing “aku” ya ing magsalita.
Andat mimisip ya ing metung a tau, ing “aku” ya ing mimisip. Andat atin yang gagauan ing metung a tau, ing “aku” ya ing gagaua. Andat atin yang akakit o ababau o alalasa o daramdaman ing metung a tau, ing “aku” ya ing manakit, makabau, makalasa, makaramdam. Andat manamdaman ya ing metung a tau, ing “aku” ya ing manamdaman. Andat ating malilyari king metung a tau, malilyari ita king “aku.”
Madalas, ing “aku” ya ing amanuan tamu panga gagamitan taya ing amanung “lub”, at ing “lub” ya ing amanuan tamu panga gagamitan taya ing amanung “aku”.
Ing “aku” nang Pedru, ya ing “lub” nang Pedru. O pilubluban na. Ing “aku” nang Pablu, ya ing “lub” nang Pablu. O pilubluban na.
Piarapan mu la dening adua kataung deni. Pilapitan mu la. Adua mung takbang ing pilatan da. Makalaue ya i Pedru karing mata nang Pablu. At makalaue ne man i Pablu karing mata nang Pedru. Ing “lub” nang Pedru, ya ing “lual” nang Pablu. Ing “lub” nang Pablu, ya ing “lual” nang Pedru. Ing “aku” nang Pedru, ya ing “ika” nang Pablu.
Ing “aku” nang Pablu, ya ing “ika” nang Pedru. Ing pamisalubung ning “aku” at ning “ika” ya pin ing “ikata.” Ini ya ing amamalayan na ning balang metung a Kapampangan ketang itamu mung Kapampangan ding makasaut king pakasautan tang iti. Ikata. At ya mu namang amamalayan tamu ngeni. Ikata. Aku ampo Ika.
King pilubluban ning metung a Kapampangan, ing “ikata” e na mu buri sabian “ako at ikaw”, “ikaw at ako”, nun e mu naman “Ako ay ikaw”, “Ikaw ay ako”. Alimbaua. Kutnan me I Maria: “Ay! Ot pangataba mo ne? At meputi ka!” Makibat ya: “O migbakasyun katang pabulan Vancouver, e.” Sinabi na “katang”, ing amanuan na “kung”. Makanian mu naman, ini. Pakiramdaman me i Pedru: “Asnana ka kapagal, dakal ya pa pagaua keka”. Ing buri na sabian: “Asnana ku kapagal, dakal ya pa pagaua kaku”. Ing amanung “ikata” atin yang kabaldugan a “pamisanmetung lub”, adua katau, dapot metung mu pilubluban.
(Abatan ya ing kasuglung)
