I
Ing gagamitan ming sulu, king bale ming tutucnangan
candila yang aldo’t bengi, macaslag king cabalenan
migit walumpulu’t atlung, banwa ya ring misalangian
bayu mitda ing pabelu, a miras king capupusan
II
Ding kecaming panimanman, capatda ning cayang apî
midayu la panimalad, panintunan da ing palî
ing lugud a mibabayang, nasa nang e malumpawî
ya na cabud ing mitagan, caring kekeng pusung sawî
III
Atin pang siyam a candila, a sinindi na canita
minantabe memasala, ketang bale detuna’na
dapot ing aslag da reti, e na calupa ning caya
a maningning a cayanti, nitang tala carin banwa
IV
Nung mengari ya sa’ng aldo, a sisilip king aslagan
matda ya man neng sisilim, at magcambil king albugan
penandit mu; panayan me, busal ning caralumduman
sunlag ya ring pasibayu, ban pasalan ing sicluban
V
Dapot iti, candila yang, mapupud a pabelu
a king mapali nang api, malalaso’t maging abu
ketang cayang pitulusan, nanan mu mang manigapu
cagisa’na, bacas na ing, malacuan a akit tamu
VI
Inia ngeni itang salang, sadiang maslag anti’ng aldo
kilub ning kekeng tucnangan, cundap cundap at mepusyo
mengulimlim at ing lugma, ya ing gulping mengibabo
kilub ning paldas ming salu, a payus nang gugulasyo
VII
Nung balu cu mung pudpud ne’t, ditac na ing mitatagan
ketang maslag a candilang, sulu ning kekeng tucnangan
inawad cu sa king Guinu, acu na ing cayang patdan
ban manatili ing sala, king bale cung pigcasautan…
