MISAN A panaun king marayung lugal
king asyenda da ring pamilyang marangal,
Karing kabayu rang migit king dinalan
kareti atin lang tutung pibuburyan
Yapin ing kabayung inaus dang alas
masanting ya bulbul kakule yang gatas,
Maporma yang dili’t masyas a talakad
at sobra ya bilis kabud yang sinibad
Dapot anyang misan apansinan de yan
matamle at e ya masyadung mamangan;
Pigaganakan de king keyang kabilyan
inia minisip lang masanting dang gawan
Nganang migsalita nitang makibandi
karing magobra na king asyenda niti,
“Manintun kong taung makapagpakaili
kening kabayu kung paburitung dili”
Malagwa’t salita dakal la ring minta
banting pakalyan de itang kabayu na;
Aapot agyang metung karing mekumbira
e re apakayli ing kabayung mola.
Menimporta la pa king lugal ning Texas
karing mangagaling at mapuring sotas,
Dapot agyang deti ala lang arapat
anyasa’t minuli lang ala king oras
Ing balitang iti abalu nang Abe,
tanyag a kutseru karin Macabebe;
E minyayang oras agad pintalan ne
ing mipabalitang kabayung matamle
“Nung ing kabayu ku”; nganang migsalita
nitang mabanding Don king keya migsarya,
“Apasagakgak me a mipnu king tula,
ibie ku’ing buri mung peka-gantimpala”
Ing gewa nang Abe ume yang linapit
ketang kabayu at ating yang sinitsit,
Ot kabira-bira pilan mung penandit
sinagakgak ne at paparak pa bitis?
Kilub ning kabukas e ne pepatugut
ining kabayu nang keng ayli mamatuk,
Pauli na niti agad deng inaus
i Abe a karin da pa pepatudtud
Ibalik mu niamu king lungkut nang sadya
ining kabayu kung sobra kaligaya,
Pigaganakan ku ing mayataki ya
nung king sobrang ayli e ya pepaynawa
Inia lepitan ne iting pasibayu
ning anak a Abe, bantug a kutseru;
Dapot kagulut na ning mayling kabayu
melungkut yang bigla at migmalun ustu
“Kagaling mu Abe aliwa kang dili
karing anggang Sota a dinalo keti;
Nanung sikretu mu sabyan mu kekami
ngana nitang Don a anting makisabi
Pekibat nang Abe… anyang lapitan ke
atin kung sinitsit a simpli mung bage;
Sabi ku keya nung ken mung keyang sese
palak na karagul ning kanakung tagle
Ita ing kalyan na at kaku mamusit
nia e patugut king kayang kagigigik,
Dapot melungkut ya’t biglang menahimik
anyang i “TULINDOY” keya ke pepakit!
Vhelle V. Garcia
Abu Dhabi, United Arab Emirates
February 14, 2014
