Ding taung ginapus ning matinding inggit
mangibabo ing muwa king karelang isip;
Ding karelang pusu daraya lang aplit
a likuban na ning laksang paginakit;
Mangalumata lang menuling king gilid
at maybug malaso ipan king giligit
Marahil uli ning sobrang pamanisip
king dirya nung inia maybug nong’ mamurit
Ding taung anti ren palaklakan mo’ mang
metung a damulag e re alasa yan;
Tabi king amanu a tutung manawang
tibatib la reti at alang masabal;
Ala lang akit den a e ra pansinan
king kaparang tau mabibie marangal;
Kabilang la karing salut ning lipunan
a babye tigatig king katahimikan
Ing masulit karen, e ra katutula
nung king kabyayan mu mamangat kang bagya;
Alub da na reti nung agawa ra sa’
pabayatan daka’t kulyutan pababa;
Ing panugali ra a makasukmama
milalalu na la king kasalakata;
makapitaid lang amanung pigawa,
ban ing kapurian mu akwa rang asira.
Ila ring awsan da a’yalang keliwan
karing makamandag a klasing ubingan;
Pilan ya mang besis mamalit balat yan
serpiyenti ya mu ring e apagtiwalan;
Agyang king palad mu karin me pakanan
eka makapihung e na ka tuktukan;
Nung iniasa’t deti dapat lang iwasan
uli ning panganib a maliaring kamtan.
Ing e masanting na pang maging epektu
madalas ning inggit king metung a tau,
kakawlan da itang e ra asaklulu
agyang kumusad la at maybug malumpu;
Apakit dang king bie e la argabyadu
makisabayan la reti maski kenu;
Inya bandang tawli imbis king asensu,
ing maging bunga na purus mung kalbaryu
Taung inggiteru makanian la dapat
ala lang balikid, alang pasalamat;
Nanu mang bage ing gawan mung masampat
iti kapilan man karela e sapat,
King pangatau ra e mu na abaklas
ing kapangalalwan; ugaling e mayap;
Uling manaluntun king karelang uyat
mabangnas a dayang sisira king utak
Nung misan ing dirya atin yang bentahi
karing ninu pa mang magtagle kaniti;
Mabibiyasa la ren ume dumiskarti
at magsikap para king bie rang sarili;
Nung makanian sana ing miral parati
karing inggiterung alang panitindi,
mekad ing paninap a imbut da reti
midinan pakibat, akwa rang miswerti
Vhelle V. Garcia
Abu Dhabi, United Arab Emirates
April 27, 2012